2 Dapot ya mekibat ya kanita, ngana karela: ¿E yo akakit deti? Ing katutuan sasabyan ku kekayu, alang mitagan keli batung mitutumpak, a e miragsa.
3 At kabang makalukluk ya babo ning bunduk Olivos, ding alagad linapit lang lihim kea, ngarang sinabi: Sabyan mu kekami, kapilan malyari iti? ¿at nanung tandang mayakit king panyatang mu, at king kawakasan na ning panaun?
4 At i Jesús mekibat ya kanita, ngana karela: Mingat kayu bang ninuman e ra ko apirait.
5 Uling dakal la ding datang king laguiu ku, ngarang sumabi ¡Aku ing Cristo! at dakal la ding piraitnan da.
6 At damdaman yung pisabyan da ing pamipamuk, ampon ing bulungbulung ning pamipamuk: mingat kayu, e ko paisira lub; uling kailangan ing malyari iti; dapot aliwa pa ing kawakasan.
7 Uling talakad ya ing dai salang king dai, at ing kaarian salang king kaarian; ampon datang ing danup at ayun king numan karian.
8 Ing keganaganang bague a iti yang kamumulan na ning kasakitan.
9 Kanita pin miabye ko king kasakitan, ampon patayan da kayu; at ding anggang tau akasaman da kayu uli na ning laguiu ku.
10 At dakal la ding mabalakid; ampon ilaila mipapanganyaya la; layun ilaila misasa kuilan la.
11 At dakal lang e tune manula ding lunto, at piraitnan do ding malda.
12 At king keraklan na ning karawakan, dimla ing lugud ding keraklan:
13 dapot ing mibata angga king kapupusan miligatas ya.
14 At iting evangeliu ning kaarian mipanaral ya king meto sikluban, king pamipatutu karing anggang tau; at kanita datang na ing kawakasan.
Ing aral a ula (katuki): Ing maragul a kasakitan.
15 Pamanakit yu pin king mabagsik a kasiran, a sinabi nang Daniel a manula, karin king Santong Karinan (Talastasan ning babasa),
