bangan kan tata, masasabi na daing tawo su harong.
Sarong maromarom na ilaw an nagbabanggraw sa gorobot na bidang, asin minapani sirilag kan mga maating katipay na nagkakapororopotan nin mga lapat asin nagkakadoroktan nin alpog. Su Señora, sunod sa saiyang ugalé namomorongko, nagtotongka sa sarong daktilang sillon. Su nagugubing arog kan sa gabos na aldaw, kun sa pagkasayod, daing data asin makangingirhat: nakaperendes nin sarong panyo, saén nangorooroldot an mga manipis asin haralipot na buhok; su badong franélang bughaw, sa ibabaw nin sarong dapat kutang maputi, asin sarong paldang lubad na minapalataw kan mga maniwang asin mga matalipning mga kalamias, na nagbinarabawan asin nangingiribigkibig na gayo. Sa saiyang ngimot may nagruruluwas na mga birilogbilog na aso, na saiyang itinotupga sa kahiwasan na saiyang naatubangan kun minomuklat su saiyang mga mata. Kun sa mga hidaleng ito nakita sya ni Don Francisco de Canamaque, pagkakamalean syang sarong kapongolan sa banwaan o sarong hokloban, dangan su saiyang natuklasan sinamnohan nin mga sarabisabi nin mga horon na tarubatib (11-a), na saiyang tinogdas sa sadiri nyang kagamitan.
Kan agang ito, dai naghinanyog nin misa su Señora, bakong huli ta habo sya, ata ngani boot magpahiling sa mga tawo asin magdangog kan sermon, kundi dai sya tinogotan kan saiyang agom, asin su pangalad, siring sa giraray, may kaibahan na duwa o tolong paglanghad, sumpa asin mga pagbabanta na sisipaéon. Talastas kan alférez na makangingising manorosanglé su saiyang agom, na an parong su sa inaapod na querida kan mga soldados, asin dai magkakanigé na ipamantaag nya sa paghiling nin mga tawong mga taga Cabecera, siring man sa mga nakikihimanwa.
Alagad bakong siring su saiyang pakasabot. Aram nyang magayon sya, makadadagka, na may sa pagkareina asin ta lalong marhay na manggubinggubingan asin orog pa kaluhosa ki sa ki Maria Clara: ini nakapatadyong, sya nakasaya nin bakong kaloskos. Kinaipuhan na sabihan sya kan alférez: “O tomonong ka o sipaon ko ika pasiring sa saimong b—banwaan!”
Dai boot ni Doña Consolacion na magpuli sa saiyang banwaan huli sa sipa, alagad inisip nya na makabalos.
Su madiklom na panglawog kan Señora dai naka-
