mga katibayan na ako bako.”
“Alagad may sarong bagay,” an saligbaton kan kahilom; “igwa nang apat na bulan, kan ipangalad an paggamit nin mga hamo, pinangakoan na gayo su mga importadores na mga daple na itotogot an mga de salon.”
Kominorondot su Saiyang Kahalangkawan.
“Alagad mahuhusay an bagay na iyan,” an sabi ni Simoun.
“Paano?”
“Masipag na gayo. An mga hamong de salon haros gabos anom na milimetro an calibre, maliban sa mga yaon sa sad-an. Itinotogot an pagpabakal kaito sanang mga dai nin anom na milimetrong calibre!”
Gabos naogma kan naisipan ni Simoun, maliban sa halangkaw na empleado na homininghing ki Padre Fernandez na ito bakong igot sa boot asin dai man ito pinagaapod na paggobierno.
“Su maestro sa Tiani,” an padagos kan kahilom na may pigbubuklit na nagkapirang mga papel, “naghahagad na taohan sya nin lalong marhay na togdokan ...”
“Ano pang togdokan kun igwa syang camarin na saiya sana?” an agaw na tataramon ni Padre Camorra na ominagap lingaw na su tresillo.
“Sabi nahaklasan atop,” an simbag kan kahilom, “asin huli ta nagbakal sya nin mga mapa asin mga cuadro sa rogaring nyang bolsa, dai nya ikakataya iyan sa maraot na panahon...”
“Alagad dai ako labot kaiyan,” an sabi kan Saiyang Kahalangkawan; “paduman sya sa Director de Administration, sa Gobernador kan lalawigan o sa Nuncio .. ”
“An sasabihon ko saimo,” an sabi ni Padre Camorra, “iyo na an moro-maestrong ini sarong deskontentong poropilibustero; honahonaon nindo na nagpapabantog an herejeng iyan na nalalapa an ilinolobong nin solemne siring mansana kan bakong solemne! Sarong aldaw sasagpokon ko sya!”
Asin ginogogom ni Padre Camorra su saiyang kamaoo.
“Asin sa katotoohan,” an pahayag ni Padre Sibyla na baga si Padre Irene sana an kinakaolay; “an boot magtokdo, minatokdo sa gabos na lugar, sa luwas; “si Socrates nagtotokdo kaito sa mga plazas publicas, si Plato sa mga tatamnan ni Academo, asin si Cristo sa mga
