kan saiyang lakaw na daing ibang hinagad na balukat kun di su duwa nyang mga marayrahay na mga revolver na Smith asin su duwang caja nin mga bala na saiyang daradara. Nagsabi na ipinamahala saiya kan mga tulisan an dakol na mga patogon sa saiyang Kahalangkawan, an Capitan General.
Asin huli kaini asin dahel ta nagbareta si Simoun na su mga tulisan sangkap na gayo nin mga escopeta, mga badil asin mga revolver, asin laban sa siring na mga tawo sard katawo minsan and kasangkap nin hamo dai makakapangalasag. An Saiyang Kahalangkawan tanganing malikayan ngapit sa panahon na an mga tulisan magkaigwa nin mga hamo, madikta nin bagong pagboot mapadapit sa mga pistolang de salon.
“!Katumang, katumang!” an panunuhay ni Simoun; “oho sa sakuya an mga tulisan iyo an mga tawong orog karahayan an dangog sa kaporoan; iyo lamang an mga nagkakamit kan saindang bagas siring sa magkakanigo. . . Naghohona kamo na kun ako naholog sa mga kamot nin. . . vamos! saimo halimbawa, pabayaan mo daw akong makadulag na dai ako koahan minsan kabanga na lamang kan sakong mga alahas?”
Si Don Custodio makikipagpasuhay kuta: an Simoun na ito sarong hambugerong mulatong americano na minapalabilabi sa saiyang pagkakatood sa Capitan General sa pagologolog ki Padre Irene. Totoo ngani na dai man sya bubuhian ni Padre Irene sa siring kadikit na bagay.
“Oho an karatan,” an padagos ni Simoun, “bakong huli ta igwa nin mga tulisan sa mga bolod asin sa mga kaalangalangan; an karatan nasa mga tulisan sa mga banwaan asin sa mga lungsod. . .”
“Siring baga saimo,” nagdugang na nagngingisi su canonigo.
“Oho, siring sakuya, siring satuya, magi kitang tapat,digdi daing nagdadangog satong indio,” an padagos kan joyero; “an maraot iyo ta kita gabos bakong mga ipinahayag na mga tulisan; kun mangyari iyan asin magontok kita sa kakadlaganan, sa aldaw na iyan ligtas an bansa, sa aldaw na iyan masirang an sarong bagong gabungan na mamahala kan saiyang sadiri mansana. . . asin an Saiyang Kahalangkawan matiwasay kun siring na makakapagsugal kan tresillo na dai kaipuhan syang ribarawon kan kahilom. . ."
