pangánib na gayo sainda, makakapagdólot sainda nin kagadanan, alagad ginagadan man ninda an gabungan na saindang pinagdadakulaan. Sa malíwag na pamahalaan, itinitimbang an banwaan na tampalasan, sa daing isusugad na tagapagpalakaw nin pamahalaan, mga paslóng mga namamanwaan asin mga magálang sa matawo, mga tulisán asin mga mahabon sa kaboboldan! Síring na kagurangnan, síring na oripon. Síring na pamahalaan, síring na banwaan."
Naghadé an sarong halipot na dai pagkinaalohan. "Kun síring, anong dapat gibohon?" an hapot kan tíngog kan naghehélang.
"Magtíos asin magpagal!"
"Magtíos... magpagal. . . !" inolit kan naghehélang na may darang kapaitan; "ah! madaleng sabihon kun dai nagtitíos. . . kun pinapasiban an kapagalan!... Kun ipinipirit kan saindong Dios sa tawo an síring na papakasakit, sa tawo na pahangang makapanárig sa panahón na ini asin pinagboborongborongan an ngápit sa panahón; kun nakita mo lámang su sakong nakita, mga makauúgay, mga daing pálad na nagtitiríos nin dai masabing mga pasákit huli sa katampalasanan na dai man ninda ginibo, mga pakagadán sa pagtáhob nin sa ibang mga pakalapas o mga kakablasan, mga amá nin angkos na binorolñot sa saindang pagsadiri tangáning magtoklós nin sáyang sa mga tinampo na nalalaglag aga-aga asin garo sanang nagaaralingáling tangáning irolobong sa pagtíos an mga angkos. . . ah! magtíos. magpagal... iyo an kabotan nin Dios! Papaniwalaon mo an iyán na an paggadan sainda iyo an saindang kaligtasan, na an saindang kapagalan iyo an kauswagan kan saindang pagsadiri! Magtíos... magpagal... Anong Dios iyán?"
"Sarong Dios na matanoson na gayo, Ginóong Simoun," an simbag kan padí; "sarong Dios na nagpapadusa sa kakulangán nyató nin pagtubod, sa satúyang mga maráot na kaugalean, an kakulangán nin satong paghalaga sa karapatan, kan mga mabansay na gawé-gawé mapadapit sa pamamanwaan... Pinapabayaan nyató asin nagigi kitang kasapakat kan maráot na kaugalean, kun gayod, inoopakán nyató iyán, matanos, matanosan na gayo na magtíos kita kan mga kinaluluwasan kan mga iyán asin pinagtitíosan man kan satúyang mga akí. Iyo an Dios nin pakahiwas, Ginóong Simoun,
