moun,” an sabi; “talastas nya na kita mga apling sa kamalean, nakita nya an saimong mga tinios, asin sa pagtogot na makamtan mo an padusa sa saimong mga sala sa pagako kan kagadanan sa kamot kan saimo mansanang mga inasusang, nakikita nyato an saiyang daing sokol na pagkaugay! Ginibo nyang mawagas saro-saro su saimong mga mokna, su mga orog karahay na pagkamokna, enot huli kan pagkagadan ni Ma ria Clara, dangan huli sa dai pakapagandan asin dangan huli sa sarong dai masabotan na pangyari... !kuyogon nyato an saiyang kabot-an asin magpasalamat kita saiya!”
“Sunod sa sabi mo,” an simbag kan naghehelang na may darang kaluyahan, “an saiyang boot iyo na an kaporoan na ini. . .”
“Mapadagos sa pinagsisiloksigokan na kamugtakan?” an salom na sabi kan padi pagkakita na nangangalangalang su saro. “Dai ko po aram; dai ako nagbasa sa isip kan Dai-maladop! Aram ko na dai nya pinabayaan su mga banwaan na sa mga huring hidale nangagsarig saiya asin ginibo syang Hokom kan pagpasakiti sainda; aram ko na sagkod pa man dai nagkulang kasu, tinimaktimakan su katanosan asin obos na su gabos na palakaw, su pinasasakitan minakoa nin espada asin nakikibaka huli kan saiyang pagsadiri, kan saiyang agom, kan saiyang mga aki, kan saiyang dai mahahaleng mga katanosan na, siring sa sabi kan manggawit na ale man, nangagkikintab dai mapapagbasangbasang asin dai magkakataranyog duman sa kaitaasan siring kan mga magkagurang man na mga bitoon! Dai, Dai, an Dios na iyo an katanosan, dai makakapagpasibaya kan saiyang kausa, an kakausa kan pakahiwas, na kun dai iyan daing mangyayaring katanosan!” “Kun siring ano ta dai nya sako itinao saiyang pangangatig?” an hapot kan naghehelang, pano nin mapait na hinanakit.
“Huli ta pinili mo an sarong paagi na dai Nya mahimong oyonan!” an simbag kan padi sa tingog na mahigpit: “an kaomawan sa pagligtas sa sarong bansa dai makakamtan kaitong nakakatabang sa kapahamakan kaiyan! Ika naghohona na an dinigtaan asin pinakanos kan crimen asin kan kaliwagan, malilinigan asin mababalukat nin saro man na crimen asin nin saro pang kaliwagan! Kamalean! Daing ibang linalalang
