nagarabot na, totoo, alagad dai pa su dakulang dagoldol (409). Dai sya namamatukaw, kinokurab; garong pigbabayo su saiyang daghan, nakakamaté sya na pinapaapod sya kan katalagahan (410), alagad kaipuhan ngohang magpataratara, maghoyomhoyom, asin dangan mahalé kuta, alagad dai nya nahimo, minatikaw, minatindog, dai nya nadadangog su mga isinasahbi saiya, dai nya isinasabi su mga naiisipan nya. Asin alintanang nangyayari an mga ini, pinagsasabihan sya nin sarong aficionade dapit sa saiyang mga cromos, tinotuyaw sya na seneseguro nanggad na nagpapakadigta sa lanob.
“!Nagpapakadigta!” an olit ni Don Timoteo na ginaganahan na kumambrag saiya; “alagad an mga iyan mga gibo sa Europa asin iyo an mga orog kamahal na nahimo kong matamo sa Manila! Nagpapakadigta sa lanob!”
Asin nanumpa si Don Timoteo na sa masunod na aldaw sisingilon niya su gabos na vale kan critico sa saiyang almacen.
May nadangog na mga siwik, dinalagan nin mga kabayo, katapustapusi!
“!Su General! — Su Capitan General!”
Malungsi sa kalodokan, bominuhat si Don Timoteo pinaghilom su kolog kan saiyang kalyos, asin kaiba su saiyang aki asin nagkapirang mga darakulang dios, luminusad sa pagsabat sa Magnum Jovem (411). Binayaan sya kan kolog, sa atubang kan kaborongan na lominaog saiya kan mga hidaleng ito: kaipuhan daw na homoyom sya o magpasagin grabe? sukat daw na gumawagaw kan saiyang kamot o maghalat na igawagaw kan General su saiyang kamot? Caramba! ngata ta dai nya naisipan an bagay na ini na ipakihumapot sa katood nyang si Simoun? Tanganing matago su saiyang molodok na kamatean hinapot su saiyang aki sa hababang tingog, na liwat na marhay:
“May ihinanda kang sarong talumpati?”
“Dai na nin mga panalumpati, papa, asin nangorog na kun ini an panonongdan kan talumpating iyan!”
Ominabot si Jupiter kaibahan si Juno, naging sarong-castillo nin fuegos artificiales, may mga brillante sa alapok, may mga brillante sa liog, sa magibong na takyag, sa magibong na abaga, sa bilog na lawas! Marayrahayon su nasosolot na gubing na sukla, na may halabang cola, binordahan nin mga birak na ralataw.
