ginadán an sarong nagngangaran na Guevara, Navarra, o Ibarra?"
Gabós huminiling sa Capitán maliban ki Simoun na isinalingoy sa ibang gampi su payo na baga may pighahánap sa pangpang.
"Ay oho!" an sabi ni Doña Victorina," "haen, Capitán? nakawalat gayod nin mga gará-gará sa tìbig?"
Nagkapira pagkiyat si ginoóng marahay, tandá na nababalding padagos, alágad kan makita su pakikimayó sa mga mata kan kagabsan, omenenotan nin nagkapirang lákad pasíring sa dólon asin sinagidsid su pangpang.
"Hiling tabí kamo dumán," an sabi sa tingog na pahangang mamaté pakatapus na masáyod nya na dai dumán nin mga ibang tawo; "alinsunod sa cabo na naglalang kan pangkat na mabókod, kan makita ni Ibarra na napapalibotan, tominagbang sa sakayán dumán sa harani kan Kinabutásan asin, pakapagparalángoy sa pagoltanan nin duwang tubig, linambat an bilog na agwat na iyán na mahigit sa duwang milla, pinatataratara kan mga bala sa lambang pagootwalán kan payo tangáning dai makahángos. Sa enotan nawará ninda su saiyang gíbay (86) asin sa horoharayó nagpakatuklás nin garong kúray nin' dugó. Asin Ingunyan na gayo igwa nang kagtolong (13) taón, aroaldaw, na nangyari iniho."
"Diyatá su saíyang bangkay?"... an hapot ni Ben Zayb.
"Sominaró sa bangkay kan saíyang amá," an simbag ni Padre Sibyla; "bakong saró man na filibustero, Padre Salvi?"
"Iyan an talagang mga barátong paglobong, Padre Camorra, anó?" an sabi ni Ben Zayb.
"Sa giráray sinasabi ko na mga filibustero an mga dai nagbabayad nin mga matanog na lobong," an simbag kan naonabihan na nagngingisi sa orog kadákulang kaogmahan.
"Alágad anong nangyayari saimo, Ginóong Simoun?" naghapot si Ben Zayb kan makita su joyero, na daing hiró-hiró asin baga may iniísip. "Ika nalololá, ika, parasákay! asin sa sarong tórong túbig na síring kainiho?"
"Dahel ta sasabihon ko saimo," an simbag kan Capitán na nagkaigwang pagmahal sa gabós na itong mga
