mga panglilibon?
“An kinaban mdopak siring sa giraray, inaapelohan an lalong makosog, an orog kabiolento!” an simbag ni Simoun kaiba an sarong mabangis na hoyom. “Su Europa ominopak kan garadanon kan mga bansa sa solnopan sa América an linaksang mga indio hayag na bakong sa pagpatindog nin mga bansang mga mababansay na gayo an mga pangungugalé asin bako na mga orog na gayong mga matoninong; yaon an Amihanan kaiba an saiyang paslong pakahiwas, su saiyang batas ni Lynch, su saiyang mga sa politikang panglilinglang; yaon an Habagatan kaiba an saiyang mga daing kamoninongan na mga republica, su saiyang mga mababangis na mga himagsikan, mga digmaang civil, mga pagpapahayag, siring sa saiyang Inang Espana! Nag-opak su Europa kan hubaan su kaporoan nin Molucas kan makapangyarihan na Portugal, ominopak kasu pohoon kan Inglaterra sa Pacifico su mga kaenot-enoteng lahi tanganing salihidan kan saindang mga nag-orolakit. An Europa maopak siring sa pag-opak sa katapusan nin sarong drama, sa katapusan nin sarong tragedia: an mga tawong hamak dai nagpaparamangno kan sa irarom, iyo sanang hinihiling an kinaluluwasan! Pakarhayon an paggibo kan crimen asin ta pagtatakahan an gomibo kaiyan asin ta magkakaigwa nin kaapil labis sa mga mabansay na gawe, na ginigibo kaiba an kalolotan asin pagkatakot-takot.
“Tyong gayo,” an simbag kan hagbayon; “anong halaga sakuya kun sa katatapusan omoyon sinda okun sumulang, kun sa kinaban na ini daing pangataman sa mga pinasasakitan, sa mga dukha asin sa mga maluluyang kababayehan? Anong mga pagisusugad an sukat kong italaga sa gabungan kun dai man iyan nin iningatan huli sakuya?”
“Tyan an muya ko,” an matagumpay na sabi kan parasogot.
Asin kominoa sa sarong kahon nin sarong revolver, na itinao saiya na olay:
“Sa ikasampolong horas maghalat ka sakuya sa atubang kan simbahan ni San Sebastian sa pagako kan sakong huring mga katogonan. !Ah! sa ikasiyam na horas dapat kang harayo, harayong marhay sa lansangan nin Anloague!”
Pinaghilinghiling ni Basilio su hamo, binalahan asin
