saindang pagadal, sa dakulang kamuyahan kan mga magurang na babaye na sa giraray garong pinaghihiling nindang binibiritay su saindang mga aki kun magpakasabot kan sinasabi kan mga libro. Si Juanito Pelaez sana an nagkolog na marhay kan pangyari, natatakot syang tumalikod sagkod lamang sa paglabas asin mamugtak sa almacen kan saiyang ama, ta ibabakas sya sa saiyang karakal; nasompongan kan sarawayon su tindahan na bakong makakaaling na gayo, alagad su saiyang mga katood, pakalihis nin nagkapirang aldaw nakita naman sya na lataw su matalidong na pagkakobakob, tanda na nagbalik na naman su saiyang mabansay na boot. Su mayaman na si Makaraig, sa atubang kaitong pagkabagsak baga bilang, nagingat na marhay na makabantaag sya asin pakakoa nin pasaporte huli sa kuwarta, nagdadalagan na sominakay pasiring sa Europa, sinasabi na su Saiyang Kahalangkawan, sa saiyang pagmawot na makagibo nin karahayan huli sa karahayan asin mapangataman kan kaginhawahan kan mga filipino, minabugtak nin kapawotan sa gabos na dai makapatunay na makakagasto asin mabuhay na baga may kaya sa tahaw kan mga lungsod europeo. Sa mga miridbid nyamo, an mga nagpakaligtas na gayo iyo si Isagani asin si Sandoval: an enot nakapasar sa asignatura na pigadalan nya ki Padre Fernandez asin naholog sa iba, su ikaduwa nakalibong sa tribunal (400) huli sa katatalumpati. Si Basilio sana an dai man nin napasaran na asignatura, dai man ihinolog-, dai man nagpa-Europa: nagdanay sa bilanggoan nin Bilibid, na sa lambang ikatolong aldaw pinagsisiyasat, na haros iyo mansana su mga hapot sa kapinonan, na daing ibang kabag-ohan kundi su pagliwat nin mga juez instructor, tara garong sa atubang nin makuring pagkaigwa nin sala gabos nagkapaharamak o nagdurulag na nagkakangirirhat.
Asin alintanang nagkakaratorog asin dinadara su mga expediente, alintanang nagdakol su mga papeles na mga sellado siring sa cataplasma nin sarong medico na daing pakasabot sa lawas nin sarong hipocondriaco, si Basilio nakakaising padagos kan ano man na nangyayari sa Tiani, kan pagkagadan ni Juli asin kan pagkawara ni Gurang Selo, si Sinong, su binanog na cochero na naghatod saiya sa San Diego, nasa Manila
