kahampang sinda nin mga magalangon na mga empleado, mga marhay makipagkasi-tawo, na minaresibi asin minadespedir sainda kaiba an dakol na saludo sa estilo frances (317) asin nagpapasinarabihan nin oui monesiour, s’il bous plait, asin pardon! sa lambang lakad na sarong kamongayahan an paghiling asin pagdangog sainda. Alagad an mga lagdaan nin mga pahayagan iyo an inaabotan kan kotod kan kaorogmahan asin kasibotan; si Ben Zayb, na itinalagang traductor asin critico kan argumento, nangingibigkibig siring sa sarong makauugay na babaye na nasosombong sa salang panghohoklob; nakikita nya su saiyang mga kaiwal na mga minabuyagyag kan saindang kamalean asin itinoturisok sainda an saindang kakulangan nin pakamidbid kan frances. Kasu kadikit pang makaiwal su Opera Italiana huli ta bakong marhay su pagkahobo kan ngaran kan sarong tenor; sarong maorihon nagbalangibog tolos nin sarong karangan inapod syang sarong daing-pakasabot, sya, su payong-taga-pagisip kan Filipinas! Sinakit sya sa paglaban sa saiyang sadiri! napiritan syang sumurat nin dai kumiilang sa kagpitong karangan asin humiling sa kaglimang kataga-tipon (318). Asin huli kan maginhawang ining giromdom an makauugay na si Ben Zayb nagiingat na gayo, dai kami nagsasabing pagtitimaan, sa dai pagarog ki Padre Camorra na nangahas na basolon sya na nagsusurat sa saindang kaibahan.
“Nakita mo, Quico?” an sabi ni Lotongboyod, “an kabanga kan mga tawo minadigdi ta nagsabi su mga fraile na dai magdigdi, sarong kapahayagan baga bilang; asin an kabanga man, huli ta sabi, na ipinapangalad iyan kan mga fraile? kun siring, dapat makatao nin adal. Maniwala ka sako, na mga marayrahay su saimong programa, alagad lalong marahay su pastoral asin daing nagbasang siisay man!”
“Katood, naghohona kaaa,” an daing pagkatiwasay na hapot ni Tio Quico, “na huli sa pakipagpalabawan ni Padre Salvi ngapit haleon an sakong mga paluwas?” “Sakale iyo, Quico, sakale iyo,” an simbag kan saro na kanayon tingkalag sa langit; “nagpopoon nang magsakit an kuwarta...”
Kuminimotkimot si Tio Quico nin nagkapirang horon asin mga kataga nin tataramon na bakong sarayod; kun an mga fraile rumalaog sa pagkatagaharubay nin mga teatro sya man malaog na fraile. Asin pakapagpaaram
