“Dai, naghehelang ako, bakong marhay an sakong pagmate,” an sabi sa hababang tingog; “kadakol kan mga nagkakaorongis sako, su mga an saindang mga kapahamakan isinasarahot sakuya, alagad...”
Asin kan mamate nyang nagkakalayo su saiyang angog, bominuhat asin rominani sa dungawan sa pagsingosingo kan mahayahay na simuy kan kabanggihon. Sa saiyang pamitisan binobotong kan Pasig su saiyang solog na pirak, na sa ibabaw nagkikirintab na mabagal su mga sabo, nagtataralibong, minapasiriring sa enotan asin minasiribog na sinosonod su dalagan kan mga saradit na arimborong. Su lungsod nagtitindog sa ibong na pangpang asin su saiyang mga maiitom na kuta minaluwas na mga makagigiram, mga misterioso, napapara su saiyang pagkameskino sa liwanag kan tala-sinag na gabos tinitiyatang (274) asin pinapagayon. Alagad nangibigkibig na naman si Simoun; garo nyang nakikita sa saiyang atubang na maisog na panglawog kan saiyang ama, na nagadan sa bilanggoan, alagad nagadan sa paggibo nin karahayan, asin su lawog nin sarong lalaki na orog pa kamaisog, nin saro pang lalaki na itinao su saiyang buhay huli saiya (275) ta nagloloba na hihinguahon nya an pagkamondag liwat bilang kan saiyang bansa.
“Dai, dai ako makakaorong,” an hagayhay na kanayon pahida su hinang sa saiyang angog; “nakauswag nang marahay su toklos asin an tagumpay kaiyan magpapatunay na ako tama... Kun gominawe ako nin siring kan saindo, napukan kuta ako ... Dai nin mga katitinyatang (276), dai nin mga mapaglinglang na mga teoria! Kalayo asin bakal sa cancer, padusa sa vicio, asin laglagon ngapit kun maraot an kasangkapan! Dai inisip ko nin marahay, alagad ngunyan may lagnat ako ... nangangalangalang an sakong isip ... talagang siring... kun ginibo ko an maraot sa katuyohan nin pag gibo kan marahay asin an mga palakaw iliniligtas kan katuyohan (277) ... An gigibohon ko iyo na dai makabantaag an sakong sadiri...”
Asin hominigda na ribaraw su isip asin naghinguhang mangatorog.
Kan pagkaaga kan sominonod na aldaw, si Placido mahoyo asin nasa ngoso su hoyom naghimate kan ser mon kan saiyang ina. Kan taraman sya kaini kan sa iyang mga kaisipan na iinteresaron su procurador kan
