Dagos su lakaw ni Paulita asin nakikita su magayon nyang tagiliran, su magayon nyang payo na marayrahay su pagkahugay naghihiro kaiba an katutubong kalandian.
Su satong mga taga-paglakawlakaw nangagpadagos kan saindang lakaw kaiba an hagayhay kan frailengartillero, asin nagpakaabot sa sarong tindahan na palibot nin mga osyoso, na madaleng ipinahonod sainda su mga puesto ninda.
Saro itong tindahan nin mga poropigurang kahoy, mga gibo sa Kaporoan, na ilinaladawan sa gabos na pagkadakula asin porma, mga tipo, mga lahi asin mga profesion kan Kaporoan, mga indio, mga kastila, mga intsik, mga mestizo, mga clerigo, mga empleado, mga gobernadorcillo, mga estudiante, mga militar, asin iba pa. Maging huli ta an mga artistas may kaaplingan na gayo sa mga padf, an mga tiniplokan kan saindang mga habito orog na kaipuhan ninda sa saindang pagpagayon, o huli ta an mga fraile, sa paggawe ninda nin siring kadakol na papel sa filipinong gabungan makapurisaw na marhay kan isip kan escultor, maging saro o ibang dahelan, an caso iyo na nagsasawa su saiyang mga tawotawo, mga marayrahay su pagkagibo, mga haraman na gayo, isinaladawan sinda sa orog kahalangkaw na hidale nin buhay, baliktad sa ginigibo sa Europa saen ipinipinta sindang nagkakaratorog sa mga tonel nin arak, nagsusurugal, nagiinom nin mga copa, nagririlitadlitad o pinaghohorohapros kan kamot an preskong lawog nin daradaraga. Dai: iba an mga fraile sa Filipinas mga tihantik, mga mabansay, mga marhay an panggubingan, marayrahayon an pagkairik sainda, hinorokol su mga pangawong asin moninong, mapaghorophorop su paghiling, santo an expresion, may diyambong sa pisngi, may sogkod na palasan sa kamot asin sadit na zapatos na charol sa bitis, na minatao nin gana na sumamba sa mga iyan asin iburugtak sa laog nin batingaw na bobog. Sa lugar kan mga tanda nin kapasloan asin dai-pagkabini kan saindang mga tugang sa Europa, su mga sa Manila kapot su libro, su cricifijo, su palma nin martirio; sa lugar na maghagok sa mga masipag na mga babayeng mga taga nayon, su mga sa Manila pinapabisahan na gayo an saindang mga kamot sa mga may pagkatawo, horohod asin haros rolohod: sa lugar nin mga despensa na parano asin comedor, an saindang mga escenario sa
