luwasan nin sarong gawe siring sa sarong torsido sa lakaw kan mga panahon. Itong minatimbang kan halaga nin sarong segundo asin nagbugtak sa saiyang mga linalang bilang enot na katogonan kan kauswagan asin pagkadai nin kakundian. Ito na kun matanos, mahagad nin mahigpit na kabilangan sa sukat magtao kaiyan saiya, sa riboribong pagisip na mga nadidikloman, an pinahababang karapatan nin tawo sa linaksang mga linalang asin kan dai mabilang na kabilangan nin nawarang panahon asin nasayang an kapagalan Asin kun sa irarom igwa nin katotoohan an mga katokdoan kan Evangelio, maninimbagan man itong mga linaksang dai nagpakanood nin pagingat kan liwanag kan saindang isip asin kan karapatan kan saindang espiritu, siring kan paghagad kan kagurangnan nin kabilangan sa sorogoon na tinawan nin mga talento (215) na sa katalawan nagpabayang habon-an!
Karapatdapat na dung-awon su harong na pinageerokan ni Makaraig. Dakula, mahiwas, duwang piso na entresuelo na sangkap nin mga marayrahay na rejas, garong colegio sa mga enot na horas nin aga asin kaparalyakan magpoon sa ikasampolong horas paitaas. Sa laog kan mga horas nin pag-aralingaling kan mga pupilo, magpoon sa paglaog sa mahiwas na zaguan sagkod na omabot sa piso principal, nagsusulwak an ngisi, an kaorogmahan asin an hiro. Mga hagbayon na mga nagpapakasolot nin magigian na mga pangharong na gubing nagkakarawat nin sipa, naghihirignit kan kosog na paggamit nin hinidale sanang mga hignitan nin kosog; sa mga hagyanan pinagsasaralakayan sa pagoltanan nin ikawalo asin ikasiyam na horas, sangkap nin mga hamong mga baston, pica, gancho asin mga panggakod, alagad generalmente dai nagkakainaranohan an mga nagsasalakay asin mga sinasalakay; an mga banog minaorontol sa talodtod kan intsik na sa hagyanan nagpapabakal nin mga korokakanon asin mga pastel na makakaindigestar. Napapalibotan sya nin dakol na mga aki, rinorognot su saiyang pinotos na rologay na asin gorobot, inaagawan sya nin
