Sibyla nagtataram dapit sa Capitulo asin si Padre Fernandez manongod sa Summa ni Santo Tomas, asin iba pa, sagkod na lominaog su cura sa Los Banos sa pagpaisi na handa na su pamahawan.
Bominuhat su Saiyang Kahalankawan asin sa bagay na ini napotol su pasuruhay.
“Hoy, mga ginoo!” an sabi; “ngunyan nagtoklos kita siring sa mga negro bago nasa-vacation kita! May nagsabi na an mga magabat na asunto dapat ipahuri. Nasa siring nanggad akong ganan.”
“Mangyaring dai kita matunawan,” an pamate kan kahilom na pinadadamgohan su init kan pasuruhay. “Kun siring ipagpaliban nyato noodma.”
Nagburuhat su gabos.
“Sakuyang General,” an hinghing kan halangkaw na empleado; “nagbalik su aki kan Cabesang Tales na iyan naghahagad na paluwason su saiyang apo na nabibilanggo sa lugar kan ama...”
Balding hominiling saiya su Saiyang Kahalangkawan asin hinapros su saiyang halakbang na angog.
“Caramba! dai lamang an saro pinapabayaan na makapamahaw sa katiwasayan!”
“Tolo nang aldaw nin kadidigdi; sarong makauugay na daragitay.”
“Ah, yawa!” an hagayhay ni Padre Camorra; “nag sabi na ako sa sako mansana: igwa akong isasabi sa General, kaya ako napadigdi... tangani kong pangatigan an hagad kan daragitay na iyan!”
Kominagaw su General sa likod kan talinga.
“Vaya!” an sabi; “padarahan kan kahilom nin sarong palayog su teniente sa Guardia Civil, tangani syang buhian! Dai sinda makasabi na bako kaming mga maugayon asin mga maherakon!”
Asin hiniling si Ben Zayb. Pominirok su tagapamahayag.
Pinagbabar-odan asin haros nagruruluha su mata naglalakaw si Placido Penitente pasiringon sa Universidad de Santo Tomas. Pahanga nang sarong semana magpoon kan omabot
