Si Basilio miabut sa San Diego igo gayud nga ang pasunding sa “Nochebuena” nagalibod sa kadalanan. Nalangan siya
hataas nga takna sa dalan, tungud kay ang kotsero nga nahikalimot pagdala sa iyang sedula, gidakop man sa mga sibil, gikulata pag-ayo ug unya gidala sa kwartel sa atubangan sa “comandante.”
Karon ang karromata mihunong na usab aron pagpaagi sa pasunding, ug ang kotsero nga nabun-og, sa dakung pagtahud, mitukas sa iyang kalo ug nangadye ug usa ka “amahan namo” sa paghitungha sa unang larawan nga tinungtong sa “andas” ug nga may panagway sa usa ka dakung santos. Maoy larawan sa. usa ka kahoy nga naputos sa tanang nagkalain-laing mga langgam nga pinakaging. Usa ka kalan nga gitungtongan sa usa ka kolon, usa ka lusong nga bato ug usa ka alho nga iglulubok sa tilad maoy bugtong niyang mga kasangkapan, daw ingon ug nagpasabut nga kadtong tigulanga didto gayud magapuyo sa ngilit niadtong lubnganan ug adto siya didto magaluto sa iyang pagkaon. Kadtong tigulanga mao diay si Matusalem, sumala sa sundanan sa pagpamuhat ug mga santos nga masabug igakita sa Pilipinas; ang iyang kauban ug kaha katalirongan gihinganlan didto sa Uropa ug NOEL ug ang iyang panagway labing masayag ug malipayon.
— Sa panahon pa sa mga santos — matud sa hunahuna sa kotsero — dagway wala gayud ing mga sibil, kay kon utasan ug kulata ang mga tawo dili gayud makakab-ut ug hataas nga panuigon.
Human niadtong dakung tigulang, miabut ang tutulo ka
mga “Reyes Magos” tongtong sa mga gagmayng kabayo nga magautas ug liksi-liksi, labi na gayud ang gikabay-an sa maitum nga hari nga si Melchor nga daw buut gayud modasmag sa mga kabayo sa iyang mga kauban.
