334
labing maayo nga pagkahimo! Si Don Timoteo nasayod na kaayo kon unsaon pagpanginabuhi dinhi sa Pilipinas!
Ang dakong kayda sa hagdanan nga gidayandayanan sa mga bulak, nahimo na hinoong usa ka kan-anan, usa ka dakong talad sa iyang tiliwala nga makalingkod ang katloan ka mga tawo, ug sa kadaplinan, sinampig sa mga bongbong, diha usay laing mga talad nga gagmay nga mapahaigo ang mga duha kun tutolo. Mga pungpong sa mga bulak, mga bukid sa mga bungahoy uban sa mga matahom laso ug mga suga, maoy anaa sa mga tiliwala sa talad. Ang kutsara sa pamanhonon pagailhan sa gibugkos nga mga bulak, ug ang sa pangasaw-onon, gitalian usab sa mga bulak sa buongon ug sa asusenas. Sa atubangan sa labihan panayandayan ug sa labihan kadaghan sa mga bulak makahunahuna kita nga mga Dalilang nga nagsapot sa masihag ug mga Kupido nga may mga pako nga bangawanon magatanyag mga duga sa bulak ug mga kalan-on sa mga Bathala sa mga dinapit sa kahanginan, sa kinataliwad-an sa mga paningog sa Subing ug sa kananoy sa mga alpa.
Bisan pa niana, ang talad alang sa mga dagkong bathala wala dinha, atua ginaalagaran didto sa kinataliwad-an sa halapad nga pantaw, sa usa ka matahom uyamot nga kiyosko, gitukod pagtuyo alang lamang niadtong higayona. Usa ka selosiya sa kahoy nga pinulog sa bulok nga bulawan nagakombitay ang mga mahumot nga bagon, nagatago sa sulod sa mga mata sa katawohan sa walay pagpugong sa kagawasan sa pagsulod-gula sa hangin, aron pagmakanunayon sa kahayahay nga gikinahanglan niadtong dapita. Usa ka nagatuybo nga pagapaga naka pahitaas sa talad gikan sa gisukaran sa ubang mga talad diin asa mangaon ang mga timawa nga binuhat, ug usa ka langitlangit nga pinintalan sa katahom sa mga labing maayong artista, magasalipod sa mga talahurong bagolbagol sa mga tinanawang masinahon sa mga bitoon.
Dinha nianang dapita walay laing makalingkod kon dili ang pito lamang ka mga tawo; ang ilang mga kutsara, tenedor ug mga kutsilyo pulos gayod mga plata, ang mga mantel ug mga serbilyeta pulos mga panapton nga mahal; ang ilang mga alak, ang labing mga mahal ug lamian. Si Don Timoteo nangita gayod sa labing talagsaon ug mahal, ug dili unta siya magapanuko paghimog sala kon ang Kapitan Heneral miingon pa lamang nga siya gustong mukaon ug unod sa tawo.
