310
nga agi sa duha ka bala, sama sa minatay nga iyang silingan nga gipatay sa dalan sa mga guwardiya sibil. Ug pagahikit-an niya ang gapus nga naglubong sa kaunuran, pagahikit-an ang dugo nga nanggula sa baba ug pagahidunggan niya nga nagsiyagit si Basilio: Luwasa ako Luwasa ako! Ikaw ra gayud ang makaluwas kanako!
— Ay Nanay, inahan ko!, nagkanayon siya sa iyang pagmata.
Sa katapusan, usa ka nahiadto sa Manila nagsugilon kon giunsa pagbuhi sa mga binilanggo. Mao ray wala buhii si Basilio, kay wala man siyay padrino. Gidungog usab sa Manila nga si Basilio idiyistirro sa Karolinas, ug gipatimaan sa usa ka sinulat diin gipahayag nga kadto pinangayo niya. Ang nagsugilon miingon nga nakakita siya sa bapor nga sakyan ni Basilio.
Kadtong balitaa nakatiwas sa pagpanuko ni Juli; nangita siya dayon kang “hermana” Baku ug sa usa ka tingog nga makapahadlok miingon nga uyon na siya sa pag-adto sa kombento ug nangotana kon mouban ba siya.
Si “hermana” Baku mitangdo, ug gipasalig si Juli nga wa nay mahitabo kaniya, si Pari Camorra, bisan tuod kundatan, apan dili magpasipala sa iyang atubangan.
Kadtong mga pulonga maoy nakatiwas sa tanan. Sa atu bangan sa mga pagtamay, nga ginuntan sa Kaligutgut, kasuko ingon sa usa ka buot maghikog, gipiyong ni Juli ang iyang mga mata aron dili siya makakita sa bung-aw nga iyang ambakan, ug sa walay pupanagana misulod sa kombento. Usa ka panghupaw migula sa iyang ngabil. Si “hermana” Bali nagasunod nga nagpahimatngon ...
Sa pagkagabii gihungihong pagtago ang nahitabo niadtong hapona.
Usa ka dalaga milukso sa bintana sa konbento ug didto mahulog sa mga pinatong nga bato ug namatay. Sa mao gihapong higayon, usa ka babaye nagdagan sa paggula sa pultahan sa kombento, nagtagawtaw sama sa usa ka buang. Walay nangahas sa pagngalan sa babaye, ug daghan ang mga inahan nga nangkusi sa ilang mga anak aron dili makayamyam ug unya mahiapil sa kagubot.
