Niadtong gabhiona may dakung dula sa TEATRO DE VARIEDADES.
Ang kompaniya sa opereta nga pransiyanhon ni Mr. Jouy nagpagula sa ilang unang dula, Les Cloches de Corneville, ug ipasundayag sa atubangan sa kadaghanan ang iyang pinili nga troupe, kansang kabantug gipasidaan na sa dugay sa mga mantalaan. Giingon nga uban sa mga magdudula nga babaye may usa nga maayo kaayog tingog, matahum ug panagway ug kon motoo kita sa mga sultisulti, ang iyang pagkamaloloy-on labaw pa kay sa iyang tingog ug katahum.
Sa ika 7 pa gani sa gabii wala nay mapalit nga tikit bisan alang kang Pari Salvi nga himatyon, ug ang mopalit ug tikit alang sa entrada heneral daghan kaayo. Sa takilya may kagubot nga nahitabo, mga away, sinumbagay, ug may gipasanginlan nga filibustero ug gilapit magtumboy ang panit sa mga pumapalit, apan bisan pa niini wala na gayuy tikit nga mapalit. Sa hapit na ang ika 8 sa gabii, daghan ang mopalit bisan unsa ka mahal sa usa ka lingkoranan sa Ampitiyatro. Ang panagway sa dulaan, nga nagdilaab sa suga ug dinayandayanan sa mga tanum ug bulak ang mga pultahan, nakalagut sa mga nahiulahi, nga nagsalig pangagho ug bagulbul. Daghan kaayong tawo nga nagbarog sa dool sa tiyatro nga nasina sa mga nanulod ug sa mga tawo nga misayo aron dili hiilogan ang ilang mga lingkoranan. Mga katawa, mga yagobyob ug mga lurat sa mata maoy isugat sa mga bag-ong nangabut, nga tungod kay dili na makasulod, mitipon na lamang sa mga nangalingaw ug tan-aw sa mga nakasulod.
Apan dihay usa ka tawo nga wala lamang magkabana niadtong tanan. Usa ka tawo nga taas ug gitas-on, da-ut nga hinay nga molakat ug nagsaguyod sa usa ka tiil nga dili mali—
