187
sa usa ka simbahan sa Isis, sa Pulo sa Philoe . . . akong nakita nga siya gigukod hangtud sa ilalum sa yuta; nakita nga siya nabuang tungod sa kahadlok ug kasakit ... ay, pari, pari sa Abydos! ako mibalik sa kalibutan aron pagsugilon sa imong pagkalampingasan, ug human ang pila ka tuig sa pagpakahilom, nganlan ko ikaw karon nga mamumuno, mabutangbutangon ug walay tahud sa mga butang balaanon! . . .
Usa ka talidhay nga kusog ug mamingawon misunod ning mga polonga, samtang usa ka tingog nadungog:
— Ayaw, kaloy-i ako . . .
Kadto mao si pari Salvi, nga tungod sa labihang kahadlok, gituyhad ang mga kamut ug napaling . . . —Naunsa ka, pari Salvi? masakiton ikaw?, nangotana si pari Irene.
— Ang kainit dinhi sa lawak . . .
— Ang baho sa kamatayon nga gipanimaho ta dinhi . . .
— Mamumuno, mabutangbutangon, walay tahud sa mga bu tang balaanon! nagpadayon pagyamyam ang ulo; isumbong ko ikaw, mamumuno, mamumuno, mamumuno!
Ug milanog ang usa ka talidhay nga pagaw, nga mao rag gikan sa lubnganan; ang ulo mao rag wala makaalinggat sa nahitabo sulod sa lawak, kay nalingaw sa pag-asoy sa iyang kaagi. Si pari Salvi gikuyapan na gayud!
— Kalooy! . . . buhi pa diay . . . nagyamyam si pari Salvi, nga gikuyapan. Naluspad siya sama sa usa ka minatay. Ang ubang mga ginang, sa pagtan-aw nila kang pari Salvi, nakahunahuna sa pagpakuyapkuyap, ug mao kiniy ilang gihimo.
—Gisalimoang . . . pari Salvi!
— Ako siyang giingon nga dili siya mohigop sa sabaw sa salag sa sayaw! minggon si pari Irene; kana maoy nakadaut kaniya.
— Apan wala siya makahigop! mitubag si Don Custodio; ang nakaingon mao nga ang ulo mitutok kaniya pag-ayo, ug kini maoy nakalipong kaniya . . .
Dinhi nahitabo ang kaguliyang; ang lawak nahimong usa ka tambalanan, usa ka natad sa pag-awayan. Si pari Salvi ingon sa patay, ug ang mga Ginang nga nagpakuyapkuyap, hiulian kay wala may mitabang kanila.
Apan ang ulo mibalik na sa pagka abug, ug si Mr. Leeds mibalik pagbutang sai panapton nga ipton sa ibabaw sa lamisa samtang miyukbo sa nanambong.
