— Eh, mister, kay wala may laing tawo dinhi kon dili kita da ug wala may mga indiyo nga mabaling nimo, motugot ka nga ipakita ko kanila ang imong limbong? Nahibalo na kami nga kini maoy usa ka lipatlipat, apan kay si pari Camorra dili man patuo . . .
Ug dayong hana sa paglukso sa uwang-uwang, aron dili na lamang moagi sa pultahan, samtang si pari Camorra namalibad, kay nahadlok nga may katarungan si Ben Zayb.
—Ug nganong dili, ginoo?, mitubag ang Amerikanhon, apan ayaw intawon gub-a kini . . .
Apan ang gumapapan didto na sa intablado.
— Mosugot ka?, nangotana.
Ug, sa walay paghulat sa pagtugot, mahadlokon nga si Mr. Leeds dili motugot, gibuksan ang panapton ug gipangita ang mga salamin nga gituhoan niya nga gibutang sa tungatunga sa mga tiil sa lamisa. Si Ben Zayb namalikas, misumbalik, gibalik pagsulod ang duha niya ka kamut sa ilalum sa lamisa ug iya kining gi-uyog: Wala siyay nahikapan. Ang lamisa may tulo ka tiil nga puthaw nga gagmay nga gilubong sa yuta.
Ang gumamapan naglingilingi sama sa adunay gipangita.
—Hain man ang mga salamin?, nangotana si pari Camorra.
Si Ben Zayb nagbalikbalik lamag tan-aw, gipikpik niya ang lamisa, gibuksan ang panapton, ug unya mihikap sa iyang ag tang sama sa paghinumdum sa usa ka butang.
— Adunay nawala kanimo gipangotana siya ni Mr. Leeds.
— Ang mga salamin, Mister, hain man ang mga salamin?
— Ang imong mga salamin, wala ako mahibalo kon hain; ang ako atua gibilin ko sa akong poloy-anan . . . Buot ka manamin? Mao rag naluspad ka ug nalain ang imong panagway . . .
Ang kadaghanan, bisan sila gikulbaan, sa pagtan-aw nila sa kabugnaw nga makantalitahon sa Amerikanhon, nangatawa, ug si Ben Zayb, hilaw uyamut ang nawong, nibalik sa iyang lingkoranan mga nagbagutbot:
— Dili mahimo; tan-awa ninyo, dili siya makapadayon kon walay mga salamin; ilisan unya niya kanang lamisa . . . gibalikan pagtabon ni Mr. Leeds ang lamisa ug unya miatubang sa iyang mga halangdon nga bisita ug nangotana kanila:
