Ang gabii maanindot uyamut ug ang plasa masadya kaayo. Aron sa pagpahimulos sa kabugnaw sa hangin ug sa mahayag nga bulan sa Enero, ang perya napuno sa mga tawo nga nangadto didto aron pagtan-aw ug aron sila usab tan-awon.
Ang musika sa mga kosmorama ug ang mga suga sa parol nakadugang sa kadasig ug sa kasadya sa tanan. Taas nga lumbay sa mga tindahan, nga nagakasiga sa mga papil nag nagdalag bolok nga lainlain, nagpasundayag sa mata sa kadaghanan mga hinugpong nga pelota, mga maskara nga linungagan sa mata, mga dulaan nga lata, mga trin, mga karromata, mga kabayong kinuldasan, mga kotse, mga bapor nga gagmay ug mga kaldira, mga pinganpingan, mga belenbelen nga kahoy, mga munyika sa laing nasud ug dinhi sa ato, mga buwagaw ug nagkatawa ang uban, ug ang uban mga maligdong ug papalandongon sama sa mga dagkung ginang tupad sa mga batang higanti. Ang binasal sa mga tambol, ang kasipa sa mga trompitang lata, ang tingog nga guho sa mga akordiyon ug sa mga organilyo nagakaguliyang lamang ingon sa usa ka konsiyerto sa karnabal, ug sa taliwala ning tanan, ang mga tawo nagsugatsugat, nanagdinip-igay, nagbanggaay, kay ang mga mata gilingi man sa mga tindahan, ug tungod niini ang pagbangga nahimong kanunay ug kataw-anan. Ang mga luwanan nagpugong sa dagan sa ilang mga kabayo, ug ang tabi, tabi sa mga kotsiro madungog sa tanang higayon; nagsugat sugat ang mga kawani, mga sundalo, mga prayle, mga tinon-an, insik, mga batan-ong babaye sinunod sa ilang mga inahan kun iyaan, managyangu-ay magkinidhatay ug maghimamatayay sa dakung kasadya.
Si pari Camorra mao rag atua sa ikalimang langit nga nagtan-aw sa daghang mga dalagang maayong bata; mohunong na man, molingi, modip-ig kang Ben Zayb, magpanakla sa dila, manumpa ug moingon: “kana, ug kana, manupsop sa tinta? ug
