— Maayo, maayo, apan Undo, unya na lamang human sa
klasi kay nagasugod na, — miingon si Placido nga mihana sa
paglugnot.
— Ah, unsa may imong kahadlokan nga ang inyong magtutoon dili man mobasa sa lista?
— Nganong dili, mobasa man usahay. Unya na lamang . . . labut pa . . . ako dili gayud mosupak kang Makaraig.
— Apan, kining sinulata dili pagsupak, igo lamang . . . Si Placido wala na manumbaling, layo na ug nagalakat nga gadali padulong sa iyang klasi. Nakadungog na siya sa mga adsum, adsum, yati gibasa na ang lista . . . Midali siya sa paglakat ug miabut na siya sa pultahan sa diha nga g'.basa na sa magtutoon ang ngaian sa mga tinon-an nagasunod sa “Q”.
— Tinamaan ng. . . — mibagolbol si Penitente nga namahit sa ngabil. Nagaduhaduha na siya sa pagsulod; siya gipuntohan na ug kadtong puntoha dili na gayud mapapas. Ang estudiyanti dili motungha aron makakat-on, motungha lang siya aron dili puntohan; ang pagtungha igo lamang sa pagpamulong sa sinag-ulo nga leksiyon, pabasahon sa basahon ug unya suknaon sa pila ka sukna nga halawom ug kahulogan, daw tigmo; ug tinuod gayud mawala ang wali, nga mao gihapon ug gibalikbalik lamang, mahatungod sa pagtahud sa mga prayle, ug siya si Placido mapaubsanon na, mapailubon ug matinahuron. Mopauli na unta, apan nahinumdum siya nga hadool na ang eksamen ug ang iyang magtutoon wala pa gayud makasukna kaniya bisan kausa, mao rag wala lang magtagad kaniya; kadtong higayona maayong pahimuslan niya aron siya tagdon ug hiilhan. Ang pagpaila daku kaayog kapuslanan, kay kon ikaw hiilhan na makalabang ka na gayud sa eksamen, kay kon masakit anq paghatag kalbasa sa usa ka estudiyanti nga wala hiilhi, hilabihan na usab kagahi sa kasingkasing kon kalbasaon pa ang usa ka batanon nga motungha adlaw nga tanan, nag-usik usa ka tuig sa panahon sa iyang kinabuhi.
Si Placido misulod ug wala magkinto, sama sa iyang naandan nga linaktan, kon dili nagpahagtok hinoon sa tikod sa iyang sapin. Ug nakab-ut niya ang iyang tinguha. Ang magtutoon mitutok kaniya, ningkisdum ang kilay ug nagyango-yango sa ulo, sama sa nagkanayon:
— Walay batasan, walay tahud, magbayad ka ra. . .
