114
— Kay aduna man ugod ing mga panapion nga nagababag sa taliwala — matud pa ni P. Sibyla sa dakung kabugnaw sa budt, nunot ang pagpiyong ug diyutay sa iyang mga mata. Mibalik pagpalihok sa iyang abaga ang tawo nga naghupot ug hataas nga katungdanan, daw wala siya makasabut kon unsa kahang panapiona kadtong gihisgotan sa prayle.
— Gawas pa nga wala mahaigo sa panahon kanang pangayoa — mipadayon pagsulti ang paring dominiko, — gawas pa nga siya nahasupak sa mga katungod nga gihatag na kanamo . . . Si P. Sibyla wala mangahas pagtibawas sa iyang gisulti ug mitan-aw kang Simoun.
— Ang pangayo makahatag ug diyutayng katahap — mipa dayon kini nga mibalus usab pagtan-aw sa paring dominiko.
Kini mikilo ug makaduha. Si P. Irene nga nakakita kanila nakasabut dayon nga ang butang nga iyang gilabanan daw dili na matabang: si Simoun diay misupak kaniya.
— Maoy usa ka pagbatok nga malinawon sa kagamhanan, usa ka kagubut nga sinulat ug papel nga sinilyohan — misumpay si P. Sibyla.
— Pagbatok sa kagamhanan? Kagubut? — nangutana ang naghupot ug hataas katungdanan, dungan ang pagtan-aw sa tanan nga nanag-alirong, daw wala siyay hisabtan niadtong mga sultiha.
— Maoy nag-ulo niana ang pipila ka batan-on nga naila tungud sa ilang pagka-mauswagon ug pagka-mahigugmaon sa mga kausaban, ingnon tang pulonga, aron lamang dili ta sila kanganlan ug lain, — misumpay ang kalihim nga mitan-aw sa paring dominiko — Tipon kanila adunay usa nga gihinganlan ug si Isagani, batan-on nga dili kaayo hingkod ug kabuot . . . pagumangkon sa usa ka kura nga “clerigo” . . .
— Tinon-an ko siya —matud pa ni P. Fernandez — ug nahimuot ako uyamut kaniya . . .
— Ka yamat! nahimuot ka diay kaniya? — miingon si P. Camorra; — didto sa bapor diriyot kami magsinumbagay: kay kanang batan-ona walay tahud: gitukmod ko siya ug mibalus usab pagtukmod kanako!
— Aduna pa gayuy usa nga gihinganlan ug si Makaraig kun Makarai . . .
