singer so dálin yon nianakan tan say España na nilubir iran
rosrosas, anta diad katuaan say gagaween yon panisinger et
golonggulong a lalo nin anawet nen say diamante. Onkekerew
kayoy pipara yod pankatonungan, say pangialig yoy ugáli yo
ra ed ugali ra ed España, agyo balet namumutektek a kekerewen yoy ipapátey yon dili, say kaandi na inkapilipino yo, say
kagalpong na dálin yon nianakan, say pagnayon na mapalalon
duksa! Antoy kasumpalan yod arapen ey? Totoon legeylegey
a linawa, bansan andi kawayangan; amin a walad sikayo ed
satan aliling toy binayes, pati saray dílin kakabósan yo ra.
Kekerewen yoy pipara yod saray kastila tan agyo labat liknaen
ya ibaing no agda kayo abuloyan! Tan anggano ipagamor da
nid sikayo bilang, antoy labay yon gaween? Antoy nagong.
goná yo ey? Sankabalgan lan nagamoran yo say panmaliw na
dálin yon nianakan a sakey a bansan mabetbet so rebolusion,
mabetbet so guerra civil ono panbabakal a panpapateyay sankakadalaan, republika na tutulisan tan totoo ran anggapoy liket
a manbibilay a singa arum ed saray bansá ed Sur na Amerika!
Antoy sinmeksek ed uló yo ya ánapen yo natan so pangibangat
na kastila, pilalek yan makapalpalek komon no aglabat saray
makapaermen a pansumpalan to? Labay yo ni lamet sirin a
panoan ni sakey so masulok lan apataplon nambabangil iran
salsalita diad sarayan kapoloan ta pian anggapo lan tuay makapantatalusan?.....
"Andi, aliwan sikatotay nagawa," kuanen Basilio; "no say pikabat day katoowan ed salitay kastila et makapaelet na pikasakey tayod Uley, nayari met ya onkanan pakapankakasakey da ray amin dian kapoloan."
"Lingon balbaleg!" kuay Simoun a sinmalabat "pababalkot kayo labat ed mararakep iran salita ya agyo sosuysuyen so katuaan, ni nenengnengen a mumutekteken a petepeteg so sábien a kasumpalan. Say salitay kastila ag balot nasabin sikatoy salita ray totoon lapag dia, say báley agton balot isalita, ta satan a salita ag mitukoy ed panagnunot tan panagliknay báley. Balang sakey a báley walay salita ton díli, unong na wala met so panaglikna ton dili! Antoy nagawaan yod pakaamta yoy salitay kastila, sikayon pigpigara bilang a makasalita ey? Pateyen yo ray liknaan, panagnunot tan ugáli yo ran sipor, isaginunor yo ray kaisipan yod utek day arum a totoo, ta piano inbis a naala yoy kawayangan et manmaliw kilan ari-
