"¡Anos labat! Ipasen mo lan binmaleg imay buaya!" kuan lamet nen Tandang Selo, ya panatambayo to.
Saman a taon arapat dan siansiay pirawat da ya salanti panayam dad polok day katoowan, ed abong a tinabla, dimad barrioy Sagpang; si amá tan si láki ninunot dan panaralen iramay sanagi lalo lay Juliana ono Julí ta oniay karinyo to, ta maganggana tan magrasia. Sakey a manbalbalolakin kaaro ra, si Basilio, manaaral lad Ibale, anta duka met so ginapoan ton singa sikara.
Sayan pikugip da balet singa masuyat a narapat. Nen anengneng day totoo ya inmabig so bilay da, pinilí ran Anakbanwa so sankaraklay kimey ed saman a boleg; si Tano ya anak a lakin pangoloan lablabin-apat taon to ni labat; nanlapo lad saman sirin tinawag day Anakbanwan Tales, akaukolan ya amagaway amerikana to, analiw na sombriron fieltro tan nanparaan la kalamor a manggastos. Ta piano agla misiblangan ed kúra tan say Uley, aabonaan to lan pupuletan ya amin iray agto nasisingil a buis, ibabayaran to ray ompapatey tan onaalis a manayam ed arum iran pasen, a dakdakel so nadadarak ton oras ed panagliber ton mansingil tan kakaakar ton panbaroy ed kapital na lúyag.
"¡Anos! Ipasen mo la bilang a dinmágop iray kakanayon ton may buaya," kuan lamet nen Tandang Selo ya manimimis na mareereen.
"Sano katangtaon mansapey ka met lay nandikola insan ka onlan manaral ed Ibale ya singa saray mamarikit ed báley!" kuay ibabága nen Anakbanwan Tales ed anak ton bii, kapag narengel to yan sasalitaen toy yaabig na bilay nen Basilio.
Sinmabí ontumbok a taon balet ta agya atuloy a kanunotan, no agta tinmagey lamet so kánon. Mabinbinta lay Anakbanwan Tales a manggugo lad uló to. Singa samay bangá amo et ipapalabí to lan ami belas ed samay kaldiro.
Nen samay kánon et asapat to lay duan lasus pisos, si Anakbanwan Tales aliwa labat lan manggugod uló to tan manngeswá; nanprotista tan nguronguró. Say kuanto balet ni may párin administrador ed sikato so no agto nabayaran, padálusan dad sananey iramay dálin, ta dakdakel so malabay a mantanem a pinmarungtal.
Inisip nen Anakbanwan Tales lawari ya manlulurey labat imay pári, balet ta saya mabinbintan mansasalita, tan intu-
