Si kabo ya ambilbilunget so lupa tod sanok to, inturo to ra may nansisipol a periso tan inkuanto:
"Paltog yo ra!"
Intalimokor da ran may perison akebiew. Manlapod agda nitagey so lima ra papaabagey iran pakakasian ya intewek day uló ra odino indapdap day lupa ran inangubay dabok. Wala lad tay ibábaga to ray ának to, wala met lay say ina ton naandiay mangaklolod sikato; say sakey isisipan toy mangiter na pilak, say sakey ontatawag ed Dios, balet ta akapatuyong lad sikaray kanyon da ran may pusil tan makatanagel a palakapak na balay amemet ed sikara.
Insan da ra insublay a pinapaltog iramay walad pontok na palandey a nankalkalna yan abalangetay asewek. Nanengneng ed saya tan ontan met ed talag na oneebat a paltog a saray ag nanengneng a kabusol taltaloray pusil da. Saramay guardia bansag so panpapaltog dad ikukurang da ya sanibsanib irad sengeg day kiew, ono ondapdap ira no arum ed yasing. ger dan panpapaatagey. Manpoktal iray baton natitiming, natataksing iray sangasangá tan no arum tonggal pirason dálin so nasosuklar ya ombabantak. Say inmonan tinmalek ya onkalab atolin ed beneg ton naknay balad takeb.
Saramay kalában ya ag nanengneng analoná rad kipapasen; saraman met so mabayanin guardia ya agda amta tay ombatik, ngalngali laran onsuner, ya tinmonda ran agdala labay so onkurang. Samay pilalaban dad ag nanengneng makatanagel. Anganggad nanengneng day asewek tan ankakabaleg a bató: anggapoy narengel dan bosis may napaaninagan dan anino. Alabas nen say kalaban da et samay palandey.
"Inan mo ra, Carolino! Iner so kawalaan ton tay abig mon mamaltog, P—!" kuanen kabon maningal.
Diad saman binmutay so sakey a lakid tapew na sakey a bató ya walay isisinyas toy awiton pusil.
"Paltog yo!" iningal lamet nen kabo ya tekep na maramsak a salita.
Taloran guardiay anumpal nian ganggan balet ta agda nakna tan siansia nin manalaglagey dimad tapew na bató; mankolyaot ya walay ibabaga to et agda natalusan.
Akatonday Carolino ta singa birbirbiren toy ereng ton may lakin malinlinew a sankanengneng a sisindagay agew. Pinagiaw balet nen kabon duyoken no agto paltogen. Pinatuyongan
