komersiante agtora labay so kuadron impintad óleo ompano
walay makapangibagan gawa ray pomipintan pilipino..... Anto,
tulongan to ray artistan pilipino? Balot! Wadmay deey panbibilay tan pati dilin bilay to pa lági, tan kabat ton peteg so
kíwas diad Pilipinas! Tua ta nangnangelan toray pomipinta ed
arum iran bansá, a singa di Rafael, Murillo, Velazquez, balet ta
agto amtay kawalaan da, insan sakey ni nayarin ompaway iran
onsusumlang ed Uley ono manangipanguloy katotongangá ed
Uley. No saramay kuadron sinasaliw to anggapon balot so
kaatapan, aliwa ran gaway pilipino, mamura ni ra, say pakanengneng kapara to lan lamang no ag magmaong ni, mabilabilay iray inkakanan kolor, pinopino met so inkagawa ra!
Anggapoy makapangibagan ag amta nen Don Timoteoy galaw
diad Pilipinas!
Samay balbaleg a kaida ya pinaparakep na rosrosas, ginawan pamakanan: walay inyan a baleg a lamisaan ed pegley a nayarin yurongay talomplon katao, tan diad liberliber to ya akapapeg la rad dingding, walaray iniíyan ya ankelag iran lamisaan a napanganay sanderua ono santatlon katao. Iniinay pegley da ran may laglamisaan na nansisipol iran rosrosas, nantatapewan iran impatondiris a bongabongá ya kalaok da ray laslaso tan silesilew. Say pasey lipong na nobio tinandaay sakey a sipol na rosas, samet so pasey nobia ininay sipol na azahar tan azucenas. Diad onman lan dakep tan bili inkakana tan karakel na rosas, singa nayari lan isipen ya inkantada ran nankawes na mapmaimpis a milmilad dagem tan cupido ran payak da ray kolor na bonlalakaw so mangisirbi matamtamoy iran álak tan mananam ya ankablin kakanen ed sankaili ran say ayaman da et dagem, diad manliet a tugtog day lira tan masamsamit ya itatarok na dagem iran tanol day arpa.
Ontan man say lamisaan ya ingganad saray atagey a dioses andid man, ta impasen ed pegley ton may maawang a batalan a bató, ed silong na marakerakep a kiosko ya impagagalan impagawa ed saman a kikanaan. Sinanibay celosian kiew a pinintaay kolor na balitok tan kinalabay ambalbalingit iran rosas day wakal, ta pian ag sankanengneng na karaklan, balet ta sayan insanib agto met sesebelay mansiplog a dagem ta pian ambetebetel so pakalikna, anggaman panaoy tiagew. Impatoon imay lamisaan ed atagey ya intablado kanian nitagey nen say kawalaan da ran may arum iran lamisaan ya dongoan da ray ordi-
