Say impibiang nen atagey a betang ya empliado ya pangiaansakit ed Basilio, inbis ya akapaabig, akapauges ed sikato. Andukey lan agew ya si Sankatageyan a Kapitan General tan si atagey a betang ya empliado et singa ag ira makapanabet ta walaray papautotey sakey tan sakey a napapabaleg irayay mabetbet a supiatan da. Akaimis a singa ag makareen si Kapitan General tan kuanton inmebat:
"Eh? Sakey ni tan a makasengeg na panlayonan tod pangawan; say sakey taon ya ompanod panaral to inbis a makapauges ed sikato, makapaabig, ya aliwa labat lan diad sikato no agta diad amin day napaktak ed lima to naanin manpatambal. Anggapoy doktor ya onkapoy a manambal ed bayag na panpraktika to. Uliten ko lamet a sakey nin makasengeg na katilak tod pangawan. Insan da lanti ibagay ontotungangad Uley ya agtayo yaansakit so bansá!" kuanton impanon manelelek ya napnoy pasiki.
Abilibili nen atagey a betang ya empliadoy inkalingo to, kanian inyan tod linawa ton tulongay anggaay nayarian toy Basilio.
"Kien balet, singa satan amon tubonbaloy sanka anggapoy kasalanan ed sikaran amin," kuanton nasisikig.
"Walaray nalmon liblibrod saray kagawaan to," kuay ebat nen sekretario.
"On, balet ta nipaakar ed Medicina tan maimpis iran liblibron sulsulat day kakastilad España ya agnira abuskag so bulong da.....tan antoy labay ton ibagá nia ey? Sakey ni satan a tubonbalo andid mad samay pandem ed pansitería, tan anggapoy akibibiangan ton anggano anto.....Unong na inkuanko la sikatoy sanka anggapoy kasalanan....."
"Lalon abig!" kuanen Kapitan General a malikeliket; "ta diad ontan say dusá manmaliw a lalon makapaabig tan onkanan áligen ta makapangiter na takut! Ontay nepeg a gaweey manuley, pinablin sinyor ko; mabetbet a nakaukolan ya ibágat so sakey ed kaabigan day karaklan.....Siak palakbatan ko ni tan: diad kaabigay sakey so pangalaan koy kaabigay karaklan, nasambot kon nilábay sengeg na pakauley a nipasubod kaatapan. Say Uley ag napaabeba no ag ingen napagalangan. Diad sayan ginawak nanbansag ya inapiger koy lingo ray kadalaan ko may arum a totoo!"
