kekerewen ton onla.¹ Kuanen sinmabí ta anengneng ton pati
bapor a mangiakar ed Basilio.
Sikatolaman a balitay akapunas na amin a panduarúa nen Julí, lalo la nimet ta apakapuyan lan maong kalamor so kaisipan to ed dukey lay lábin agto pakakaugip tan karakel na makapataktakut iran kugkugip to. Ampotipoti lupa to tan manligab iray matá to, linman inanap toy hermana Balí ya imbaga tod bosis a makatalagnaw a labay to lay onlad konbinto tan tinepet to no labay to nian ibaan.
Akaliket si hermana Balí tan sisimbáwaen ton ekalen toy pága to, si Julí balet agto dedengelen no agta nengneng toy maganat lan makasabid konbinto. Nanapiger a maong, insulong toy sankaabigan a kawes to ya kanengnengan toy masaysayaksak. Malabilabir anggaman singa ag mansusuldongay ibábaga to.
Binmuat lara. Walad onaay Julí ya nanaingungotan ta matantantan si iba ton natitilak ed beneg. Balet ta nen manasingger la rad báley, mankakalkalnan manandi may bisbiskeg ton manakar, agla oneseesel, abalang to lay sekder na linawa. to, mantantay akar to tan natitilak lad unor. Akaukolan lan sosugsogan nen hermana Balí.
"Siglatan moy daiset ta nalabian ita," kuanto.
Manomtumbok si Julí ya ampotipoti lupa to, osdong iray matá to, ya ngalngalin agtora itangua. Say pakaisip to sankanengneng lay amin a too ya itoturó ra. Singa ingingisiw ya ombubutbot ed layag toy sakey a ngaran a marumsis, et mantetelektelekan tan andi tonda ton manaakar. Ontan man, kabantag tod konbinto, tinmondan manggiwgiw.
"Ompawil itilad, barrio, ompawil itila!" kuanton mikakási ya pinugeran toy iba to.
Akaukolan nen hermana Balín binenbenan ed taklay tan inggayugoy na daiset tan pinakepá toy takut ton tinotungtongay libron sulsulat day papári. Anto tay antakut to et agto met taynan; sakey ni si pári Camorra dakel so youlo ton arum; insan si Julí et sakey met labat a dukan taga úma.....
_________________
1Sayan gawa ya maamot a panamasout ed saray totoon finapen ya onsusungpad Gobierna ya manpirmay sulat a pangerew na pangialis ed sikarad arum a polo —aliwan simit labat na kaisipan nen Rizal, no agta mabetbet a nagagawa ya pasakbay ed antoman ya ompaway ed unor no saray boleg bilang et mansákit iray uló....
