nong ta lapo bilang ed diad samplora ono labinduan kuarta ya
awaten nen managpakan kapag sakey a ulo et yapag toy limaran kuartay kanunong to?"
Manketket si pári Fernandez ed bibil to. "Ambelabelat lara tan ya ipapakasalanan," kuanto, "tan naluloksoan yo lay nanpaknaan tayon inggetar a salitaen."
"Andi, Amá; say sasalitaen kon anggad natan say nipaakar ed saray manaaral. Saray papárin ampotí, tan agko ibagay sikayo ra, ta ilílikor ta kayo lantí, saray papárin ampotí na amin day wadian togiop, say kipapasen da managtaganó ed pakatalus tan kanunotan, insan da ibábagan ipapalapag ya agdan balot ibabaing, ya ag mancpeg a makalaem kamid kakabatan ta nasabí agew ya ipasout mi manbilay ed kawayangan! Singa la aliling toniay ag panlabay na makapangan so inpangaw ta pian ag onabig so kagagawa to et ag makapaway ed pangawan. Say kabaliksay kawayangan ed too singa kabaliksay pakaaral ed pakatalus, tan say agda panlábay na papárin ampotí ed pakarapat mi nia, sikatoy gapoy amin day irirap na linawa mi."
"Say bangat ag nayarin iter no ag labat diad saray makankanepegan!" kuay ebat nen pári Fernandez ya insiglá, "say pangibangat na kakabatan ed totoo ran legeylegey ya ugáli tan anggapoy benben na linawa, kaptekay panagnunot tan kagagawa, kabaliksan toy panmurmura tan pangekal na galang ed dilin kakabatan."
"Tan, akin et walaray totoon legeylegey ya ugáli, anggapoy benbey linawa, tan kaptekay panagnunot tan kagagawa ey?"
Sinintak nen dominiko ray abalá ko.
"Kakulangan iran sinoso, nasusugiap ed utel day boleg.. amtak pa lagi?"
"Andi, padre Fernandez!" kuanen Isaganin ag apukpokan; "ginagala yon ag inukait a kinotoan yan pamaákaran; ginagala yon ag inosdongan ya anggad kaaraldalemay iipnok ta mapaga kayon nasagmak yo rad man a nanengneng so anino ray agági yo ed togiop yo. Sikayoy akankasalanan no oniay pinawayan mi. Saray totoon napepespes na uley a masulit tan nasnaspot, napasout iran mangiamot na petepeteg a liknaan da tan mankonkonwari; saray totoon pangigigimoray katuaan, anggapoy arum a niiter ed sikara no ag puros tila; say manuley ya masulit tan nasnaspot, panmaliwen toray oúleyan ton aripen iran sinaliw. Anggapoy benben na linawa, kaptekay kanunotan may
