lan bansay Pilipinas, tan anggapo lay mas agutgot tan maguló
nen say Uley dia! Inunot tayo yay pansit sirin ed bansa tan
diad Uley!"
"Inunot tayo!" kuandan nanbabansag.
"Sungpa ak!" kuanen Isagani.....
"Pagalangan iray kulang nid taon, pagalangan iray napapaunong!" Iningal nen Pekson ed bosis ton malungolungog a bansag na impangiwaswas toy pukel na nganak.
"Inunot tayo yan pansit ed kinen intsik Quiroga, sakey ed saray apatiran sankamakapanyarian ed Pilipinas," kuanen Isagani.
"Andi, diad kinen Eminencia Negra!"
"Agkayo maingal!" kuay sakey a singa ag palikas, "wala ray pigaran kumpog na totood mad plasa ya manbabantay ed sikatayo, insan amta yo la, say dingding walay layag to."
Tua ya wala ray polok na totoo ed kapag petek na dorongawan, insan tinmondan aminpinsan so sayaksak tan elek ed saramay pananganan met iran kabkaabay, a singa bilang dedengelen ono iimanoen day gagaween daran may manpupunsia. Sansananey so keneng.
"Mandiskurso ka la, Tadeo!" kuay Makaraig ed sikato ya makalkalna.
Nanpapaknaan da ya si Sandoval, lapod sikatoy sankaabigan a mansalita, sikatoy unor a mandiskurso.
Si Tadeo ta sipor a mangirás ag nanparaan, kanian apildit ya agto amtay gaween to. Legan ton mangisusuboy andukerukey a sotanjun nonunoten to no panoy pakalabot to, tan anunotan toy sakey a diskurson impatlep dad klasi tan apaabig ton aligen la ya salatsalatan labat iray arum a pasen.
"Inararok iran agágik ed "kanunotan!" kuanton inggapo ya bansag na impangiandawes toy duaran kinayasan a bislak ya ikakana ray intsik a pinagka tenedor ono kutsara.
"Ayep, ikbanan mo ra tay bislak ta ginolgol mo lay buek ko!" kuay sakey a kaabay to.
"Diad impamili yod siak ya onsublay ed ataynan ya....."
"¡Aligalig!" kuay Sandoval a sinmalangat "satan imay diskursoy panguloy Liceon panaaralan tayo!"
"Diad impamili yod siak," kuanen Tadeon intuloy ya amagamagá, "ya onsalat ed pasen ya tinaynan ed.....nunot koy (inturó to balet so egés to) sakey a lakin matalonggaring tan atagey ya inkatoo ya diad abig ton katoliko, diad karakel na
