Tinmondan agano ya nanduarua.....
"Talineng moak, Paulita," kuanto lamet ya intuloy; “kabat moy panangarok tan panamablik ed sika, kabat mon peteg ya dumay liknaan ko no ilimgis mo rad siak so matám, no natalimokaan kod kalilimgis moy layap na aro.....ontan man, no bilang anggapoy nagawaan mi, panárien kod kaisipan koy sakey ed saray limgis mo, tan ompateyak a malikeliket, ta nayarin nanengneng ya onkidiam ed saray matám so sakey a sinag na paspasirayew diad pangibeliaw mod sankamundoan ed pangiturom ed bangkay koy: 'Imbágat na inarok so bilay to ed impibakal ton pangilaban tod saray pankatunongay dálin ton nianakan!'"
"Itilad abong ta lábi la ompan napanateng ka, Paulita!" kuanen Donya Victorinan intawag.
Akatonda ramay mantotungtong. Kasesempet lan tua, tan binagaan day Isaganin milad sikarad luganan ya inako to met nian tampol ya agla impapaspasout. Manlapod luganan nen Paulita, impalabí ray yurongan ed beneg ed kinen Donya Victorina tan samay iba ran marikit, tan diad bangkitoy niyurongan dan may saninaro.
Say pakapilugán tod Paulita, pakapiábay to, pakasungap toy samióng na balingit to, pakasapigar tod samay kawes ton sutla, panamamáyo tod sikaton nengneng toy sinonunot, ya nankurosan iray taklay to tan naames na liwaway bulay Pilipinas a makapangiter na ontan lan karakpan ed antoman ya nasindagan to, singa sakey a kugip ya ag balot inilaloan nen Isaganin ontua! Alay inkamasegsegang na pakanengneng tod saramay manaakar a bukbukor tan nakaukolan day ompaliis a palabasen imay mapmaples a panlugluganan to!
Legan dan nanluganan, dimad tinunton dan gilig na baybay, diad pasiaray Sabana, tan diad taytay na España, anggapoy arum ya anengneng nen Isagani no ag bukor labat na makaayayap ya diking na lupa nen Paulita, say makalakalat ya impangapiger toy buck to, tan marakerakep a beklew ton singa nilálik ya asaksakbongan ed sengeg toy mapmaimpis tan anlemlemek a pinya. Singa kinkindatay sakey a brillanten mankidiam ed tambutambong na melag tan asimsimbang ya inkatabas na layag to, brillanten aliling toy sakey a bitewen ed utel na lurem iran singa pinakpak a pilak. Singa nanaamingaw nen Isagani araw-
