Mansilunget la tan say bilunget lalon lolooren toy kaermenan ed puso nen Isagani ya ngalngalin anggapo lay ilalo ton makapinengneng ed kinen Paulita. Saramay manpapasiar mankakalkalna laran ontataynan a mamapaarap ed Luneta, ya sankarengel ya anggad mad kawalaan toy makaananlay iran tugtog a manlálapod man ya itatarok na mansiplog ya amíyan; saray marinero na sakey a barkon pibabákal ya akadoong dimad ilog, gagaween dalay nakaukolan daran sumpalen kasakbayay isabi lábi tan kalabkalab iran basilbasil ed nambabanlangan iran lubilubir a mapmaples iran singa ra gigang; amin iramay sakayan mantotumbokan iran manseselsel na ankakabaleg iran parol a pakapatnagay walaray totood man, tan dimad gilig na baybay ya,
Kukuleten iray dagem daluyon iran mareen
Ya esaes day makalna ed sisipoakan dan pangdel
A maples dadalasan dan, andi iba ran nanengneng..... unong na kuanen Alaejos1 ontatagey so kelpan mankakalkalna ya manmamaliw a singa mapmaimpis ya abel a mankankaninag ed sindag na liwaway nansulaw a bulan.
Naamingaw so arawrawin tanol a manasingger lan manasingger. Linmingaw si Isagani tan puso toy ginmapon manparok na pinaspasia nen anengneng toy nitan lan luganan a sinagoray kabayo ran ampoti, ya kabayo rayan nabirbir ton tampol anggan niutel ira ed kabayo ran sanlasus libo. Manluglugan. ira di Paulita, Donya Victorina tan samay amiga nen Paulitan iba ra nen lábin imbeneg.
Agni akadagoy Isagani, akaepas lan malikliksi Paulita tan inimisan toy Isagani masamsamit a singa mangokuyong; akaimis met si Isagani tan diad impakanengneng tod Paulitan manimimis singa nanwakas so tawen ya amin iramay lurem tan saramay ambilbilunget iran kanunotan to naandipat iran aliling na asewek. Maliwliwaway nengneng na tawen, masamsamit a kansion iray milmilad dagem, tan singa napnoy karosasan iray dikadikad dalan. Salambengat ta wadmay Donya Victorina ya tinawag to nimet a tampol si Isagani a pitetepetay nambabangil a nipaakar ed Don Tiburcio, ta manlapod insipan nen Isagani lanti ya anapen ton suysoyen so inamotan to, ya patulongan ed amin day kabkabat toran manaaral.
_______________
1 Fray Miguel de Alaejos, parí ye sikatoy Prior ed Escorial nen Ari ed Españay Felipe II.
