ipapatnag toy pananisia to tan susumpalen toy ibabagay konsiensia ton díli.
Diad samay lábin pangipapaway na Les Cloches de Corneville akayurong si Basiliod arap na lamisaan a daan a naaral ed silew na sakey a lamparaan a larak, a samsamet naliliwawaay maerermen a lupa to ta samay tubon salming et burarog. Akadatak dimad tapew na lamisaan so sakey a pukel na ulóy too, arum niran pukepukel tan pigaran libron inapipiger ya impandarasig. Wala met so sakey a palangganan nankargay danum tan esponja. Sankaangob so ápian a manlalapod mad biek a silir, a singa to papápaletey dagem ya ililinawa, ya ngalngali lan nayepyep si Basilio. Saya popukpokan toy pakakaugip to ya babasabasaen toy muling to tan saray matá to, ta agto labay so unogip anggad pakasumpal ton may babasaen to. Sakey yan libron manngaray Medicina Lega! y Toxicología ya gawa nen Dr. Mata, ya impabayes dad sikato tan nakaukolan ton ipawil a tampol. Si catédratico agto labay so mangikanay arum a libro, tan si Basilio anggapoy isaliw to ta saray managlako intagetagey day bili to ta manlapod sebel so iloob ton man a librod Pilipinas, nakaukolan dan suksokay akama yamay ya empliados ta pian makapangiloob ira. Diad panaaral to. agto naarap a binuskag so pigaran mapmaimpis iran liblibro ya impawit dad sikaton agto amtay nanlapoan da, liblibro ran nipaakar ed Pilipinas a walan nibilang ed sikaray makatatawag a maong na imano ed saraman ya agew ed panagpauges tan panamasakit dad saray ának na bansa. Si Basilio agto ra naarap a básaen tan sakey ni, akaamper met la lágid sikatoy kanunotan a makapairap na linaway namurmura tan napabaingan insan anggapoy pakayarin onebat onebat tan mangiagel ed inkasikan díli. Ta salanti nagagawa, saray aturon mangaasikaso no anto ray nayarin ipalapag odino onloob a babasaen diad Pilipinas, aabuloyan day panmurmura ed saray pilipino balet ta sebelan da ra yan onebat.
Diad onman lan keneng ed abong a say alenleneg a rerengel et say mataltalag tan makalkalnan sanggouk a manlalapod mad biek a silir, alikas nen Basilioy anlemlemew iran kondang ed takayan, kondang a binatak day kaida ya amaarap irad mad kawalaan to. Tinmangwá, anengneng toy pinton linmukas, tan diad baleg ya inkikelawan to, linmoob si Simoun ya ambilbilunget so lupa to. Nanlapod samay impandumog dad
