Si Simoun tuan ag linmad teatro.
Nanlapo nid a las siete lábi inmakseb lad abong to ya ag makareen tan ambilbilunget so lupa to. Saray igaganggán to amidua ran anengneng a sinmabin nagsisananey iray ibiba ton totoo; a las ochoy lábi arumog nen Makaraig a liberliber ed lansangay Hospital, dimad asingger ed konbintoy Sta. Clara, peles na kampanay simbaan a manogtugtog na algonias; a las nueve ed saman lanlamang a lábi anengneng met nen Urang ya Insanglil dimad kaliberliber na teatro ya misasalita ed sakey a lakin nengneng na estudiante, tinmobong ed pinto, insan pinmaway met a tampol tan naandipat lad sanib daran may kakiyewan.
"Anto konoy walad siak ey?" kuanen Urang ya Insanglil; "anto konoy nagonggonak ed pamasakbay kod báley ey?" Si Basilio, unong na inkuan la nen Makaraig, agmet linmad sarsuila. Kasabi to kalamor a nanlapod San Diego ya anundon ed kaaroan ton Julí nen saya et nipaunong ya impaugaw, pinawil to lamet iray libro to, tan no andid hospital a manaaral, kokumponien toy Kpn. Tiago ya seséetan a tatambalen.
Si agmakayari manlour so ingongot to. No maugés so uló to, no aliwaliway liknaan to ta daiset so asungap ton ápian ta si Basilio lantí et dadankaan toy anggaay nayarian to, panpasnokan toya, kabilen to ni no arum, pantamian toy pinaspasia. Amin iraya itetepel nen Basilio ta say nonunoten to so pakagawa toy maabig ed toon akautangan toy maong a linawa, tan pagustoan to labat no talagán anggapo lay nagawaan to. Si Kpn. Tiagod satan no napda lay gusto to onabig lay uló to, onlemek so púso to, táwagen tod satay "anak" si Basilio, onnangis no nodnunoten toray panagsirbi tod sikato, say abig na
pangaasikaso to ray daldálin to, tan ibaga ton gaween ton to--250-
