"On," kuay ebat nen Makaraig a tekep ton may imis ton ampaipait; "makapaabig ed sikatayoy inkidalan to! Kagkapansalita mi nen pári Irene!"
"Antoy kuanen pári Irene ey?" kuay tepet nen Pekson.
"Singa met ibábaga nen Don Custodio, insan pinilisitaan toak ni ingey bagel! Say comision a diníli ton tinumbok so apaabig nen Don Custodio, inabubonan toy kanunotan ya imparungtal, tan pipilisitaan to ray estudiante ed panangaro rad dálin dan nianakan tan say pilalek dan makaaral.
"Akin sirin ey?"
"Salambengat ta, manlápod karakel konoy gagaween tayo ra, tan piano ag kono naapa yan kanunotan, say pakatalus da so say manepeg a mangikurang tan mangisumpal nian kanunotan sakey ed saray togiop day papári, no bilang ta saray dominikos et agda labay ya itekep yan ipasen ya eskuilaan ed Universidad da!".
Agda apukpokay impakapangibulos day salita ra may estudiante ya pakapatnagay inkaapay ilalo ra. Si Isagani inmalagey ya andi esel.
"Tan piano nanengneng a walay pibibiangan tayo ed pangikurang nian eskuilaan," kuanen Makaraig ya intuloy, "impabetang dad sikatayoy pansingil na usos ya iter tayo naani ed Tesorero ya turoey togiop na papárin mangikurang, tan sayan tesorero itdan to itayoy risibon pakanengnengay impangawat to..."
"Manmaliw itayon anakbanwa sirin!" kuanen Tadeo.
"Sandoval," kuanen Pekson, "nitan la may guantes, dukdok mo la sirin!"
"Pui! aliwa tan a guantes say pakaangob ko singa midias a maringot!"
"Tan say lalon makapalek," kuanen Makaraig ya intuloy, "so say kuanen pári Irene nepeg tayo konon panliketan yan inkagawa ya mangiter itayoy sakey a baleg a pakan odino sakey a serenata ya nanaawit itayoy mandarlang a sinigit, a sakey ya panangipatnag day estudianten lapag ed pisasalamat dad amin iramay totoon anulong ed sikara!"
