Kangel dad sayan balita, nannenengnengan ira, walaray nankikindatan, walaray angibesngaw na panduarua ra, pananisia ra, tan wala met iray angigapoy salsalitan apulpultot ya agdalara intuloy.
"Mialalig ed kinen Monte-Cristo!" kuay sakey a biin labay ton ipangtan dakel so nababasa to.
"Odino manangiter na nakaukolan ed Palasio!" kuay lakin onkakaraw ed samay bii, ya makakaimon lad Simoun.
Dimad palkon kawalaan da ran may estudiante, say atilak si Pekson, Sandoval, tan si Isagani, ta si Tadeo nila toy Don Custodion talibagaen ya totungtongan niray katalakpitan to ra nian kanunotan, ta pian mankanawnaway Makaraig ya misalita ed kinen Pepay.
"Unong na kuanko lad sikayo, amigo Isagani," kuanen Sandoval a mangakaksion tan diad bosis ton makaananlay, ya labay ton ipangel ed saramay mamarikit ed biek a palko ya ának to ran may mayaman ya imbaga nen Tadeon akautang ed sikato; "unong na inkuanko la, say salitay francés aliwan masamit a dengelen tan arawid salitay kastila ed dakep, búlos na panagibekas may tanol ton marandanet tan maananlay nia. Agko natalusan, ag nagawat na kanunotan ko, agko naisip no panon ira kasi managtalumpatin francés, panduaruaan ko no kasi ta walaran kapigan man, nen inmonan panaon, may diad arapen, no aleey petepeteg a talus na salita, tan pakaisip ed manepeg a kakabatan day managdiskurso. Ta ag manepeg a panbalowanen so salitan managdiskurso tan say salitan dalda! odino labirot. Ta saray daldal tan labirot narumog irad amin a bansa, walaran atakatak ed dinan man iran pasen ed sansinakoban, diad utel day amaga nen bonot ya ingles, tan ontan met ed limog day mabilay a ulat tan marlang a liknaan a francés.....
Tan dia to impatumbok so marakerakep ya impangiosaosay kanengnengan tan kipapasen day nambabangil iran bansa tan nanduruman ugáli ra, ed makaayayap a pananalita. Si Isagani tanger a tanger labat kalamor, balet ta say kanunotan to walad kinen Paulita ta abiglaan to yan sankalimgis to ya matá to ray singa mansasalita ya nambabangil so labay dan ibaga.
_______________
1 "The Count of Monte Cristo", tungtong yan insulat nen Alejandro Dumas- sumusulat a francés. Diad sayan tungtong, si Monte-Cristo akalmoy dakel a kayamanan tan nanbilay a nanlaskan maong
