"Walay nonunoten dan mauges!..... Nakaukolan ya asikasoey bolsa!"
Et nen akarapas toy anggapoy anggan sakey melag ed bolsa to, sinintak to ray abalá to lamet. Anto konoy walad sikato ey, anggan napaktak so tawen?
Tan intuloy toy panliliberliber to. Nen linmabas ed arap na duan kataon mantotungtong, apatipatan toy kuay sakey ed sikara, toon pigapigay balsakan tan karkarmen ya kilawitwit ed beklew to, ed salitay tagalog:
"Lalon makapanyari ni ray papári nen si General, sika musmus; saya ay magangganó la dia, saraman ay ag irá onalis. Dápot no sustoy gawaen ta, pakapilakan taya. Say sinyal paltog!"
"Mauges la ya!" kuanen Urang ya Insanglil ya inelet to ray gamet to. "Diad biek si General, dia ay si pári Salví..... Pangaskasíyan la yan bansa!..... Et, anto konoy walad siak ey?"
Insan to lamet sinintak iray abalá to ya bansag na inlukda to, duara yan kagagawa ton pakapatnagay anggapoy walawalad sikato, balet ta ag tinmondan maniimano.....
Legan da ra nian nagagawa, andí tonda ray nambabangil nengneng na luganan ya onsasabin manbanesbes, ontonda ran maganod mad petek na pinto pian makaepas iray atatagey ya inkatoon linmulugan. Anta samsamet ambetel saray bibii akakolibenben iray ankablí, ono akapanyolon iray sutla tan wala ni ra ingey akalatop anggaman aliwa met a makapakapal. Saray lalaki, lalo lad saramay akasulong na frac tan akakorbatay ampoti nan overcoat ira, balet ta saray arum agda insulong, awit da labat ya akasalakday ed taklay da ya akapaway so aporo ran sutla.
Diad polok da ray mirón wadmay Tadeo, saya may estudianten bigbiglan onsabi sakit to no nitan lan onakseb so catedrático, ya inibaan to may kabaleyan ton kasulsulming tod klasi ya estudiante ya anengneng tayon nairapan ed aliwan impakabasa toy bangat nen Descartes. Sayan estudiante mausisa ya andi agto tepeten, tan si Tadeo met sasamboten toy panigsisia to tan agto pikakábat a lalantaway ankakabaleg. Kapag kastilan mangibanod sikato, anggano sankaabebaan ya empliado odino managlakod basar, ibaga tod samay iba to ya panguloy sakey a baleg a negosio, ono marqués, conde, etc.....No wala balet so linmabas a kastilan ag angibanod sikato.....psh! ibaga ton sa-
