papakná. Sikatotay petepeteg a kawalaay kabat ed pananguley."
Si Don Custodio no manalsalitan nipapaakar ed isisipen ton manepeg ya pangikurang na uley, kulang to lay salitan dakep na pananguley. Tan no bibitlaen toy salitan pananguley, iyonat toy lima to tan yabeba ton anggad katagey na toon akatalimokor ya akatewek.
No diad panagnunot a nipaakar ed religión, ipapasen toy inkasikaton katoliko, sankaabigan a katoliko. Ah! say Españan katólika, dálin nen Marian Sankasantosan!.... Say sakey a liberal masulosulok a nayarian to, tan manepeg ya katoliko, no saray totoon abangonan a panagnunot ya onsusumlang ed kurang tan bolaslás na panaon, et ipapasen day inkasikaran Dios ono kagkaabebaan lay sasantos, a singa sakey a mestiso negro ya nabaloan lan ampoti ed Cafreria.¹ Ontan man mansisiray asalian a legay Mablin Agew likod labat ed Viernes Santo, agton balot mankokonpisal, ag manisia ed saray milagro tan say ag kalilingoy Papa, tan no mimisa, pilien to may misay a las diez odino say sankaganoan, ya misan ingganad saray sondalo. Anggaman nen walad Madrid et pinapauges to ray papári ed pila tod agos ya impasen to ran abangonan ya agla ontukoy cd panaon ya onkukurang, tan mapalaloy impandansak tod Inquisicion, ya wala ni ray tongtungtong ton nambabangil ya makapakasalanan tan marurutak a nipaakar ed kawes na pari odino papárin ag nankawes na kawes na pari, ontan man, no salitaen toy Pilipinas a niduma ran ganggan so manepeg a tuntonen no uleyan, onsigam odino onokok, kalilimgis toy nantarok na araldalem a talus, iyonat to ngolay lima to ed samay katagey a makapappainap.
"Nakaukolan iray papári, sakey iran makapairap a kaukolan," insanto ikuan.
Balet ta agay lay pasnok to no walay ontalek ya indio ya manduarua ed saray milagro odino ag manisia ed Papa! Tan diad panagnunot to amin iray panagpairap na Inquisicion kulang iran panusa ed ontan a katalkan.
No walaray manawag ed imano ton mangibaga ya say pamatulok ed arum iran totoo, odino say gawan samboten a panbilayan a yamanay ag pikakabat na arum a too et walay pananingaran
________________
1 Sakey a bansa ed Africa.
