"Anta anggapoy kinan to!" kuay ebat nen Don Custodion manggiwgiw; "agto alisay matán may uló kanian apatulok ton apakapoy..."
Dia la ginmapoy baleg a guló; samay salas singa hospital, ono lawak a panbabakalan. Singa bangkay so nengneng nen pári Salvi, tan saramay bibii nen anggapoy mangasikasod sikara pinaabig da lay onolid liknaan.
Legan tonian nagagawa, nagmaliw lan dapol imay uló, tan si Mr. Leeds sinakbongan to lamet imay lamisaan na panyo insan to inlúgay iramay onnenengneng.
"Nakaukolan ya isebel ya ipapáway," kuanen Don Custodio nen onla iara; "sungpad religion tan maptek a panagnunot tan kagagawa."
"Lalola nimet et ag mangikakanay espejo," kuanen Ben Zayb ya inarum.
Balet ta kasakbayay inalis to, pinerá to ni linawa to, nilokso to may sában, sinmingger dimad lamisaan tan intagey to may panyo: anggapon balot so wadman.¹
Diad kaimbuasan angipalapag na babasaen a panasalitaan toy kakabátan iran maamot, espiritismo, etc.; manomtumbok a tampol ya impaakseb so sakey a ganggan na gobernador eclesiástico ya isesebel ton patotundaen so pangipaway nimay ulón mansalita, balet ta naandipat lay Mr. Leeds ya inawit to lad Hongkong imay maamot ya ipápaway to.
________________
1 Ag balet alingoy Ben Zayb. Saramay taloran sali lamisaan walay kanal da ya paparlasan dan tatageyay ispijo ran akaamat dimad silong na intablado ya ag ira naimano lapod samay kajonkajoy alpombra, Diad pangigaton nimay kajon ed tapew na lamisaan walay napildit ya itetelpek ten mankalkalnan ontagey iramay ispijo; no ekalen imay panyo, alsaen ya ag ipakaruskos, samay lamisaan ed satan manmaliw ya singa dinan man ya lamisaan ya ikakana ed panangipaway na uló ran mansalita. Walay angitekep nimay lamisan ed samay kajon. Kayari tan may ulón mansalita samay managsalamanka, sakbongan to lamet imay lamisaan, walay itelpek ton singa botonis tan onleksab lara may ispijo.
