Marakerakep so lábi tan masaysayaksak so nengneng na plasa. Manlapod masamsamit a mapayapayay dagem tan managaag so bulan na Enero, saray totoo walara lawarin amin ed feria ya onnengneng, panengneng tan mantaligaygay. Say togtog ed kawalaan day cosmoramas1 tan say liwawa ray akamayamay iran parol mangiiter na sayaksak tan liket ed saray katoowan. Saray nandarasig a lakoan a manlangalang irad parakep daran manesiab a maimimpis a lata tan papil iran nambabangil a mankanyang a kolor, ibubuskag dad mata ray katoowan so nansisipol iran bola, máskaran dinedeyeng ed matá, galawgalaw iran lata, tren, karkariton, kabkabayon ankelag a kokuirdasan, luganan, sakayan ya ankekelag so mákina ra liplipong ya ankekelag Inkianak a ginagawad kiew a saleng, ugawugaw iran gawad arum a bansa tan gawa met ira dia, makakaimis iramay akaona ya buek day kolor na buek na mais, mabinbinta tan singa sinonunot irayay unor ya aliling day ankekelag a bibii ed abay day ugugaw ya ankakabaleg. Say tanol day tambor, say makatelek a sumpit day tutot a lata, say angesan a togtog na akordion tan organon papatlekey lima, mankakames ya ag amtay pandenglan, insan yarum ed sayay totoon onsasabi tan onsisipot, a mantutolakan, mantatalapusan ya akalingaw irad saramay lakoan, kanian onmanlay betbet na topaan a makapalpalek. Saray luganan ngalngalin ag ira makakurang tan say "tábi! tabi!" ray kotsiro anggapoy tonda; mansasabatan iray empliado, saray militar, papári, estudiante, intsik, mamarikit iran katayatdang a kaulop daray kainaan ono papanginaen da, ya manbabanoan iran amin, wala met laray mankikindatan, tan mantetepetan iran malikeliket.
_______________
1 Kuadro ran nantotumbokan a pakanengnengan na saray ankabaleg iran baley tan siudad ed mundo ya no takilingen irad saiming a binmikongkong
manmaliw a singa togtúan naitday bilay iray akapinta.
