a leksion, nilampinit toy pinaspasia, tan ontan lay inkasakitan
to ya nanlapod saman kapag narengel toy salitan pirma, singa
to ni nalikas iman ya inkapilat lawari layag to.
"Itepel moak, saló, balet ta agko manpipirmay agko amtay lugan to."
"Agay lay inkatapis mo a! Pinirmaay duaran carabineros celestiales,1 antoni pagam ey?"
Say ngaran a carabineros celestiales masulosulok lan ma ngiter na pananisia. Sakey yan masantos a moyong ya inletneg ya intalagan pansirbi tan panulong ed Dios ed pibakal ed arid kabilungetan, tan pamaat na singa bilang pakapalbot ed saray herejes tan aliwaran kaisipan da ya makaderal a tuloy ed pulok day Nueva Sion.2
Lapod maganat si Plácido manpirma lawari pian nasumpal la, ta saray ibiba to et dadasalen da lay O Thoma,3 balet ta singa alikas ton sisinkaten nen pangamaen tod layag, kanian inkuanto:
"Naani no kayari klasi ta labay ko nin basaen!"
"Anta andukedukey et, nengneng mo pa! Nipaakar ed pangiparungtal na isungpa ed sakey a pankerew, singa bilang sakcy a protesta, amtam? Si Makaraig tan arum niran iba to kekerewen day panlukas na sakey ya eskuilaan a pambangatay salitay kastila. Akanengneng ka lay ontan a kalokoan....!"
"Maong, maong! Naani la ta ginmapo lara," kuanen Plácido ya ombabatik la.
"Anta ag manpapasalistay profesor yo!"
"On, on, manpasalista met no arum. Naani, naani! Sakey ni.....agko labay a sumpaey Makaraig."
"Anta agto kabaliksay onsugpa ka, no ag kien labat....."
Si Plácido agto la narerengel ta arawi la ya masigsiglat so akar ton onaarap ed klasi. Dengdenglen toy nanduruman adsum! adsum! Anto laya, manpapasalista!..... siniglatan toy akar to tan sustosuston walarad letran "Q" nen onsabid pinto.
"Lasí lanti....!" kuanton inmeremeré ya inketket ed bibil to.
___________________________
1 Pananawag ya ed saray kailiay "Milicia Angélica," moyong dayay manaaral ya inletneg day papárin dominiko ta piano sarayan manaaral et lawas mabilay ed pagew day dalit dad religion, logor dad nanaralan da, tan aro rad saray papári.
2 Say salitan Sion ngaran na sakey ed saray apatiran palandey ya angiletnegay siudad na Jerusalém.
3 Darasalen dayay manaaral kasakbayay pangigapoy klasi.
