limpek tan midias ton ampoti, amasnok ed samay iba to tan
nilimgis toray ansakisakit iramay osioson manmimirón.
"Puros a pilyo!" kuanton nguronguró; "agmora nenengoengen, osdong ka!"
Anggapoy onlabas ed saramay estudiante; andi agda naimano, amin pansutilan dan kutengtengen. No maminsan sakey a marakep a victoria¹ ya ontondad mad petek na pinto ya niluganay sakey a boleg a mapamisa, ya ondalaw irad Virgen del Rosario2 ed agew ya ingganán pangigalang ed sikato; saray matá ran may manpapalabas ed satan mamakuyep iran ag onkirekirem ta pian natakiling dan namurian maong so inkatabas tan kinabaleg na bitking tan sali ray mamarikit ed pangitagey day sapey dad yepas dad luganan; no maminsan met sakey ya estudianten sankanengneng nin akapintad lupa toy dálit na impandasal to, ya sinmamar a mikasid Virgen ta pian natalusan toy leksion, tan pian nanengneng to ompan wadmay kaaroan to et makapilimgisay daiset ta pian diad itobong tod klasi et awitawit toy pannodnunotan tod maararo ran matá to.
Biglan diad saraman a nanduruman polok et nalikas so singa duman kiwas, singa bilang walay tatalaranan dan amin, tan si Isagani apultot so pansasalita to tan pinmesiaw. Tinmondad petek na pintoy sakey a marakep a luganan a sinagoray duaran kabayon ampoti, ya kabat da laray wadman. Sikato may luganan nen Paulita Gomez tan saya masigsiglat ya inmepas ya aliling toy malikliksin manok ya agto ra initday tiempon makanengneng ed sali to ramay puros a pilyon mantatalaran. Diad masansanting ya impangigalaw toy laman to, tan talabit day lima to, inapiger ton indalinep iray piligis na sapey to, insan diad masiglat ya impangiparlas to ray matá ton singa ag ginagala, anengneng toy Isagani, imbano to ya tekep na imis. Manomtumbok ya inmepas si Donya Victorina, imparlas to met iray matá ton aka quevedo3 ed kawalaan doran may estudiante, anengneng toy Juanito Pelaez, akaimis, tan im bano toy masalsalamsam.
Binmalangay lupa nen Isagani ed gaway dalang na liknaan to, tan inebatan toy impangibano nen Paulita ya napnoy sikig; si Juanito intewek ton pinaspasia ya nanlapod balam-
___________________________
1 Sakey a klasi luganan.
2 Patrona ray togiop day papárin dominiko.
3 Salming ya anggapoy kawitan tod layag no agta isisigpit labat ed nansikaray eleng.
