- Sic itur ad astra1
Diad sakey a kabuasay Disiembre, say bapor a mangaray Tabo,2 manpapatulon mairirap ed malikew ya ilog na Pasig ya awit to ran linmugan so akamayamay a pasajeros ya onarap ed luyag na Laguna. Sayan bapor bontog, mababel, malimpek la warin singa tabo ya angalaay ngaran to, maringot ya anggaman ampoti nengneng tod paway, ambelabelat a mabinbinta nisengeg met la lagi ed matantantan a kakukurang to. Ontan man, maalak lay linawa ray totood sikato ed saraman a pasen, manlapo lagid ngaran ton tagalog odino lapod awit toy tanda ya pakanengnengad bengabengat lan wadiad sayan bansa, ya singa bilang pananalo ed bolaslas; sakey a bapor ya aliwa met a petepeteg a bapor, sakey a manbibilay ya ag nanauman, masala balet ta ag natolakan, a bangno labay ton ipanengneng a mimilad aliguas et mankapol na pintan ampoti.
Anggapoy duarua ya sayan mapalar a bapor et pilipinon petepeteg! No wala labat lay anggan daiset a pilalek a mangilingoan niray kakulangan to, n:ayari lan tawagey Bapor na Uley bangta saray nanaasikaso nen gagaween et saray magalang a papari, tan atatagey so inkatoo ran maneegnay betang.
Sankasikdakay agew na kabuasan a mamapakidiam met na binel tan burakan ton may ilog, tan ontan met a pangankantaen toy dagem ya onlalabas ya onsisiplog ed saramay makulaney a kakawayanan ya ontutubod biek tan biek a pangdel, sankanengneng ya ampotipotin onkukurang a manasasewek na andekedeket ed tuktok.... kuanda ta say Bapor na
- 1 Salitay latin ya kabaliksan toy: Oniay dalan ya onarap ed saray bitewen.
- 2 Ungot.
