Manginngiras tan akisakisan si Plácido Penitente ya manaakar ed Escolta ya onarap ed Universidad na Santo Tomás.
Saksakey simba nin lamang so insabí ton nanlapod báley to, amiduá lan nansulat ed kinen iná to ya ouliten toy pilalek ton ontonda lan manaral tan onanap la. Binalés nen iná to ya bíbilinen ton manános ya anggano angga labat ed pakasumpal toy bachiller en artes,1 ta makaparpaermen met no ontondan anggapoy asumpal to, kayari apat taon ya impan gastos. tan impanirap dan impanggimper a sanina.
¿Anto kasi akasengeg akin et kainglit nen Penitente natan so manaral, anta sikatoy sakey ed saray sankaaralan ed colegio nen pári Valerio ed báley na Tanawan? Ipapasen dad may Penitente ya sakey ed saramay sankaabigan a manalitay latin tan sankasiliban a misupiatan, a magmainomay dan gotgoten may oksuyen iray yanoyano may masuliwet a bengat lan pamaakaran. Saray kabaleyan to ipapasen dan sankataleman, kanian say kúra ra nisesengeg ed sayan kibabantog to, ipapásen to lan filibustero, ya masulosulok lan pakapatnagan yan aliwan alintaweng ni musmús. Saray kakaaro to agda natalusan iman a pilit to lan ompawil ya agla manaral; anggapoy amta tod hunkián2 tan mataltalag ya onialek a mirevesino;3 agto met sisigsiaey bilin day papári, elckan toy Tandang Basio, onsusulok na kuarta, mabli tan mararakep iray kakawesen to, et anggaman onia, mabetbet a mauges so uló ton onourong, tan kaingungot a singa kadimla ton pati saray liblibro to.
Dimad Taytay na España,4 taytay yan say ngaran to labat lay nanlapod España ta pati saray inkakanan balatyang et nanlalapo rad arum a bansá, naulop to ray amin a tubonbalo ya
_____________________
1 Duay taon ya aralen kasumpal na High School, kasakbayay pangigapoy abogacia, medicina, ono arum niran aarålen.
2 Sugal na intsik a say ikakana nipis.
3 Sugal met na nipis a manaloy sankaraisetan so natilak a nipis to.
Janes Bridge so ngaran to natan.
