yay komadua balet aabubonan to, tan diad saray kimey ton nipaakar ed saya sesekderan nen sinyora Condesa.
"Anto ey, anto ey?" kuay tepet nen Kapitan General a nanaupotan lay ános.
"Say kuestion nipaakar ed armas iran ikakana ed sport."
"Isebel ira!"
"Itepel yoak pa kagalang kon General," kuanton may atagey a betang ya empliado, ya mabinbinta; "abuloyan ak pay katageyan yo ya mangipanunot a say panangikanay armas iran intalagad sport et aabuloyan ed amin iray bansá ed sansinakoban.....
Sinintak nen Kapitan General iray abala to. "Ag itayo onaalig ed dinan man a bansá diad mundo," kuanton amagamagá.
Lanangla ya si Kapitan General tan samay atagey a betang ya empliado et ag ira manaabet ed panagnunot da, tan masarag lay pangibaga toniay unor na anggan anto, ta pian si Kapitan General et manpaawet ya ag balot mangiter na punget.
Samay atagey so betang ton empliado, sinalsali to lamet ya insali sananey a pangidalanan.
"Saray armas ya ikakánad sport et saray utot tan nganak met labat so napasákitan da," kuanto, "ompano ibagara la laingen a..."
"Nganak itayo?" kuanen Kapitan General a sinintak to lamet iray abalá to; "antoy walad siak ey? Aminpigá da lan asubok ya aliwa ak a nganak."
"Kien balet," kuan met nen sekretario; "apat bulan la anganko natan a nen insebel so pankanay armas, impaspasiguro ed saray sankaili ya manangiloob dia na sarayan tagilako ya saray armas ya ikakana ed sport et yabuloy ira."
Sinilot nen Kapitan General iray kirep to.
"Walay polaing ton tan," kuanen Simoun.
"Anto ey?"
"Sankainomayan. Amin lawarin tatawagey armas na sport a nanenengneng ya ilalako natan say kalibre ra ono awang na abot da anemiran milimetro. No ontan sirin nayarin abuloyan so panlakoy amin iramay armas ya anggapo tan ya anemiran milimetron kalibre ra!"
____________________________
1 Say labay ton ibaga nia so payoti ya anggapay inkalaki to.
