Bismillahirrahmanirrahim
Kumula kisah ngon bismillah, nama Allah nyang that muliya
Alhamdulillah pujoe keu Tuhan, dum seukalian ban sineuna
Washshalatu wassalamu 'ala Muhammad wa alihi wa shahbihi ajmain
Damikian lagi ateueh ai sahbat dumna
Amma ba'du teulheueh nibak nyan, nyoe karangan ban meutiara
Abéh khutubah seureuta simpan, jinoe karangan phôn kumula
Subhanallah that ajaéb, wahé sahbat deungo beu rata
Nanggroe tanyoe toe kiamat, alamat le that Tuhan peunyata
Kubri ingat dumteu saré, bèkkeu lalè peuseutöt dônya
Kubri tanbéh dalam kitab nyoe, ngokeu jinoe hé syèedara
Kisahku nyoe mupasai-pasai, soe na akai jibicara
Pasai phôn kisah kuseubut, meunaté dumteu saré tapeucaya
Beu le taingat nyankeu meunaté, bèk meung lalè deungön dônya
Soe nyang ingat pagé peutang, Tuhan reujang neuampôn dèeca
Beu le taingat bèkkeu teudôh, supaya runtôh ladat dônya
Seupeureuti ban sabda Nabi, narit nyang suci sangat mulia
Aktsiru dzikraha dzimil ladzat, meunankeu Nabi neumeusabda
Beu le taseubut nyang peuhilang ladzat, nyakni maw'ot bèk talupa
Beu taingat malam uroe, pajan tawoe bak Tuhan nyang asa
Pajan salèh talôp lam jeurat, salèh pat teumpat tatinggai dônya
Salèh jinoe salèh euntreut, hana meuhat han meung hingga
Salèh uroe salèh malam, hana trôh pham manusia
Soe nyang maté bak keujahatan, keurugian peue karônnya
Beu le taseubut keu meunaté, keuet keu ubat lé nibak dèeca
Malam uroe beu na taingat, supaya seulamat nibak mara
Soe nyang seubut siuroe duwa plôh, Tuhan runtôh dijih dèeca
