I’Don Rafael ibat pa inyang kabayangnan ya kaluguran da ne ring ortelano. Ing pamipagalo king gabun a pigmula’na’t peparagul ning pengari na masalusung linabung. Linub la't menuknangan karin ding menibat karing aliwang balen. Dinatang la ring intsik at itang malating kuta ketang aldo megawa yang metung a baryu at mika pari yang komanggi. Kaybat, ing baryu meging balen ya. Kamate ning sadyang pari, datang ne man i’Fray Damaso.
Lub ning panaun a yan, itang aun ning pengari na at itang makapaligid karin e ra ambanganan. Ding anak a masikan a lub ilang mamisan-misan susulud karin at tatapang la uling magdala lang kapsa at taiktik. Managtal lang byabas, kapaya, makupa at aliwa pang prutas. Kabang sama’lang managtal, mekabulad mu atiglapan de ing lumang lubid a makabitin karing sanga at bigla nala mung manabu ring mapilan a batung e ra balu nung nu menibat. Kaniti, sulpit no ring anak at gugulisak da "ing matwa... ing matwa. . .at pamalabag do ring prutas at taiktik, paglundagan do ring tanaman at mabilis pupulayi ro ding mangaragul a batu busal ning malabung a talahiban anggang e la milwal king pulu. Ati'nang maputla, ati'nang gagalgal, ating mangapakyak at detang kanwari mayli, pamangayli lang misakab.
