E pin sana minta Malakanang ing tenyente dapot abalu na rin ning Capitan General ing milyari.
King pamakipagsalita na karing kadwanga’na dikil king bilalag da ring pahayagan Menila a nung nu re patunggitan king lagyu ra ding kometa at batwin, abanggit na ning metung kareti ing pisasabya’nang Padre Damaso a nung sakali man mengaragdagan ditak dapot atyu ing tune merapat.
"Kaninu yu wari abalu?” nganang kinutang makatiman ning Capitan General.
"Kang Laruja, kabang sasalita na nanding abak keta king Pisusulatan.”
Tiniman yang myuman ing Capitan General at nganang tinuglung: “Ing babai o ing fraile, e la pikakanlapan. Ukulan ku sana ing mye tahimik kabang ati ku pa keti at e naku bisang mika pisasabyan pa karing lalaking makasaya. Atin pa. Abalu ku mu naman king ing pekapun da gewa nang biru ing yutus ku. Inawad kung ilipat de ing frailing yan anti mong parusa kaya. Linipat de pin sa dapot dela re king metung a balen a lalu pang maragul. Malik-matang fraile! ing yaus mi karin España.. Inyang ya nang dili na ing Capitan General e ne titiman. “Ah! nung ding memalen e la sana tutung makmak pututan ko bagyus deng curang den!” nganang mangisnawang saldak. ‘‘Dapot ing balang bansa atin yang katulid a kapalara’na, inya daptan ta na mu itang daraptan da ring sabla.”
I’Capitan Tiago naman ibat neng mekipagsalita kang Padre Damaso o kaya, i'Padre Damaso ibat neng sabyanan i’Capitan Tiago.
‘‘Inya ngeni balu mu na,” nganing franciscano inyang ume neng tipa. ‘‘Ing sablang iti sukat mipanginlagan nung akutnan mu ku mu. Panikwanan mung e na ka darapat aliwang kamulangan at manalig ka king tegawan mu.” Pibalikbalikan neng Capitan Tiago ing sala, mimisip malalam at mangisnawang saldak. Mekabulad, anti mo waring inutus na ning metung a magligtas a bungang-ukul,
milayi ya king silid a pipangadyan da at
